މާލޭގެ ވިޔަފާރި ބަނދަރުގެ ބޭރު ޖެޓީގައި އަޅާފައި އޮތް ބާޖަކުން ރޭ ކަނޑަށް ވެއްޓުނު ފަސް ކޮންޓެއިނަރުގެ ތެރެއިން ތިން ކޮންޓެއިނަރެއް އަދިވެސް ނުފެންނަ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުން މައުލޫމާތު ދެއްވި ގޮތުގައި، ބާޖަކުން ފަސް ކޮންޓެއިނަރެއް ކަނޑަށް ވެއްޓިގެން އެމްޕީއެލްއިން ރިޕޯޓްކޮށްފައިވަނީ ރޭ 11:00 ގެ ފަހުންނެވެ. އެ ވަގުތަކީ މާލެ ސަރަހައްދަށް މޫސުން ގޯސްވެ، ވަރަށް ބޮޑަށް ވިއްސާރަކުރަމުންދިޔަ ވަގުތެކެވެ. ކަނޑަށް ވެއްޓުނު ފަސް ކޮންޓެއިނަރުގެ ތެރެއިން މިހާތަނަށް ފެނިފައިވަނީ ދެ ކޮންޓެއިނަރެވެ. ބާކީ އޮތް ތިން ކޮންޓެއިނަރު ހޯދުމުގެ މަސައްކަތް ކަމާބެހޭ ފަރާތްތަކާ ގުޅިގެން މިހާރު ދަނީ ކުރަމުންނެވެ.
އެމްޕީއެލްއިން މައުލޫމާތު ދެއްވާފައިވާ ގޮތުގައި ކަނޑަށް ވެއްޓިފައިވަނީ މުދާ ނެތް، ހުސް ކޮންޓެއިނަރުތަކެކެވެ. ނަމަވެސް މި ހާދިސާ ހިނގަން މެދުވެރިވި ސީދާ ސަބަބެއް އަދި ސާފެއް ނުވެއެވެ.
Advertisement
ފުލުހުންނާއި އެމްއެންޑީއެފުން ލަފާކުރާ ގޮތުގައި މި ކޮންޓެއިނަރުތައް އޮޔާދާނީ ދޫނިދުއާއި ފޭދޫފިނޮޅާ ދެމެދުންނެވެ. އެހެންކަމުން، އެ ސަރަހައްދުން ދަތުރުކުރާ އުޅަނދުފަހަރުތަކުން މިކަމަށް ޚާއްޞަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކުރައްވާފައެވެ. ވަކިން ޚާއްޞަކޮށް ރޭގަނޑު ދަތުރުކުރާ ފަރާތްތަކުން މިފަދަ ތަކެތީގައި ޖެހި ހާދިސާއެއް ހިނގިޔަނުދިނުމަށް ފާރަވެރިވުމަށް ވަނީ އަންގާފައެވެ.
