ޣައްޒާގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ހަނގުރާމައާ ދެކޮޅަށް ސުލްޙަވެރި މުޒާހަރާއެއްގައި އަޑުއުފުލި ފަލަސްތީނު ދަރިކޮޅުގެ އިސްރާއީލު ދެ މުސްލިމަކު ޖަލަށް ލުމަށާއި ބޮޑު އަދަދަކުން ޖޫރިމަނާ ކުރުމަށް އިސްރާއީލުގެ ހައިފާ މެޖިސްޓްރޭޓް ކޯޓުން ޙުކުމް ކޮށްފިއެވެ.

މި މައްސަލާގައި ޙުކުމް ކޮށްފައިވަނީ އިންސާނީ ޙައްޤުތަކަށް މަސައްކަތްކުރާ އުމުރުން 42 އަހަރުގެ މަޝްހޫރު ވަކީލު އަޙްމަދު ޚަލީފާއާއި، އުމުރުން 31 އަހަރުގެ އެކްޓިވިސްޓް އަދި ސޯޝަލް ވޯކަރ މުޙައްމަދު ޠާހިރު ޖަބަރީންގެ މައްޗަށެވެ. ކޯޓުން ނިންމާފައިވަނީ އަޙްމަދު ޚަލީފާ އަށްމަސް ދުވަހަށް، އަދި މުޙައްމަދު ޖަބަރީން ހަތަރުމަސްދުވަހަށް ޖަލަށް ލުމަށެވެ. މީގެ އިތުރުން ކޮންމެ މީހަކު 5،000 ނިއު އިސްރާއީލީ ޝެކެލް (ނީސް) އިން ޖޫރިމަނާ ކުރުމަށްވެސް ކޯޓުން ވަނީ ޙުކުމް ކޮށްފައެވެ.

މި ދެމީހުންގެ މައްޗަށް އިސްރާއީލުން ދަޢުވާ އުފުލީ 2023 ވަނަ އަހަރުގެ އޮކްޓޯބަރު މަހުގެ 19 ވަނަ ދުވަހު، އަރަބި އާބާދީ ބޮޑު އުއްމުލް ފަހްމް ސިޓީގައި އިސްކޮށް ތިބެގެން ކުރިއަށް ގެންދިޔަ މުޒާހަރާއަކާއި ގުޅިގެންނެވެ. އެއީ ޣައްޒާގެ އަލް-އަހްލީ ހޮސްޕިޓަލަށް ޔަހޫދީން ދިން ނުރައްކާތެރި ޙަމަލާއާ ގުޅިގެން ހިތާމަ ފާޅުކުރުމަށާއި ހަނގުރާމަ ހުއްޓާލުމަށް ގޮވާލައި ބޭއްވި ސުލްޙަވެރި މުޒާހަރާއެކެވެ. އިސްރާއީލު ފުލުހުން ބާރުގެ ބޭނުންކޮށް އެ މުޒާހަރާ ރޫޅާލުމަށްފަހު، މި ދެމީހުން ހިމެނޭހެން 11 މީހަކު ހައްޔަރުކުރިއެވެ.

އިސްރާއީލުގެ 2016 ވަނަ އަހަރުގެ "ކައުންޓަރ-ޓެރަރިޒަމް ލޯ" (ޓެރަރިޒަމް މަނާކުރާ ޤާނޫނު) ގެ ދަށުން އުފުލި މި ދަޢުވާގައި ކޯޓުން ބުނީ "ޖާނާއި ލެއިން އަހަރެމެން ޣައްޒާ ސަލާމަތްކުރާނަން" ފަދަ ސިޔާސީ ޝިޢާރުތައް އެމީހުން ބޭނުންކުރި ކަމަށާއި އެއީ "ނުސީދާކޮށް ޓެރަރިޒަމަށް ބާރުއެޅުން" ކަމަށް ބަލައި ކުށްކުރިކަމަށް ސާބިތުވާ ކަމަށެވެ.