ފަލަސްތީނުގެ އިސްތިއުމާރުކޮށްފައިވާ ބިންތަކުގައި އިސްރާއީލުން ގާއިމުކޮށްފައިވާ ޣައިރުގާނޫނީ އާބާދުވުންތަކާ އެކު ކުރާ ހުރިހާ ވިޔަފާރީގެ މުއާމަލާތްތަކެއް މަނާކުރުމަށް ނޯވޭ ސަރުކާރުން ނިންމައިފިއެވެ.
ނޯވޭގެ ހާރިޖީ ވަޒީރު އެސްޕެން ބާތު އީޑޭ ހުކުރު ދުވަހު ނެރުއްވި ބަޔާނެއްގައި ވިދާޅުވީ، ފަލަސްތީނުގެ ބިންތަކުގައި އިސްރާއީލުން ހަދާފައިވާ އާބާދުވުންތަކަކީ ބައިނަލްއަގުވާމީ ގާނޫނުތަކާ ހިލާފު ތަންތަން ކަމަށެވެ. މި ނިންމުމުގެ ދަށުން، ފަލަސްތީނުގެ ހުޅަނގު އައްސޭރި، އިރުމަތީ ގުދުސް އަދި ގައްޒާގައި އިސްރާއީލުން ހަދާފައިވާ އާބާދުވުންތަކުގައި އުފައްދާ މުދަލުގެ ވިޔަފާރިކުރުން މަނާކުރާނެއެވެ.
މީގެ އިތުރުން، އެ ސަރަހައްދުތަކުގައި ބިން ގަނެވިއްކުމާއި، އިމާރާތް ކުރުމާއި، މަރާމާތު ކުރުމުގެ ޚިދުމަތްތައް ފޯރުކޮށްދިނުމުގެ އިތުރުން، އެ ސަރަހައްދުތަކުގައި ހިންގާ ވިޔަފާރިތަކާ މުއާމަލާތް ކުރުން ވެސް މަނާކުރުމަށް ވަނީ ނިންމާފައެވެ.
Advertisement
އީޑޭ އިތުރަށް ވިދާޅުވީ، އިސްރާއީލުގެ އާބާދުވުންތަކުގެ ސަބަބުންނާއި ހަރުކަށި ޔަހޫދީން ފަލަސްތީނު މީހުންނަށް ދެމުންދާ އަނިޔާތަކުގެ ސަބަބުން ހުޅަނގު އައްސޭރީގެ ހާލަތު ވަނީ ވަރަށް ބޮޑަށް ގޯސްވެފައެވެ. "އާންމުން މަރަމުންދާއިރު، އިގްތިސާދު ވަނީ ހީނަރުވެފައި. އަދި އެތައް ބައެއްގެ ދިރިއުޅުން ވަނީ ބަރުބާދުވެފައި. މިކަންކަން މިހާރުން މިހާރަށް ހުއްޓެންޖެހޭ،" އޭނާ ވިދާޅުވިއެވެ.
މިދިޔަ ހަފުތާގައި ނޯވޭއިން ވަނީ އިނގިރޭސިވިލާތް، އޮސްޓްރޭލިއާ، ކެނެޑާ، ފްރާންސް އަދި ނިއުޒީލެންޑާ ގުޅިގެން، ފަލަސްތީނު މީހުންނަށް އަނިޔާކުރާ ހަރުކަށި ޔަހޫދީންނަށް ފައިސާގެ އެހީތެރިކަން ފޯރުކޮށްދޭ ފަރާތްތަކާ ދެކޮޅަށް ދަތިކުރުމުގެ ފިޔަވަޅުތައް ވެސް އަޅާފައެވެ.
ނޯވޭ ސަރުކާރުން މިހާރު ވަނީ މިކަމާ ގުޅޭ ގާނޫނު އެކުލަވާލައި، އާންމުންގެ ހިޔާލަށް ހުޅުވާލާފައެވެ. މި މަޝްވަރާތައް ކުރިއަށް އޮތް ސެޕްޓެމްބަރު މަހުގެ 19 އާ ހަމައަށް ކުރިއަށް ދާނެ ކަމަށް އެ ގައުމުގެ ހާރިޖީ ވުޒާރާއިން މައުލޫމާތުދެއެވެ.
