މެދުއިރުމަތީގެ މަޝްރަޙު ގޯސްވެ، އެމެރިކާއާއި އީރާނާ ދެމެދު ކުރިއަށްދާ ސުލްހައިގެ މަޝްވަރާތަކަށް ހުރަސް އެޅެމުންދާތީ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އަމަލުތައް ހުއްޓުވުމަށް އެމެރިކާގެ ރައީސް ޑޮނަލްޑް ޓްރަމްޕަށް ސިޔާސީ މުހައްލިލުން ބާރުއަޅަން ފަށައިފިއެވެ.

މިކަމާ ގުޅޭގޮތުން ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ބުނީ، އެމެރިކާއިން އޮތީ ސުލްހައަށް ފުރިހަމައަށް ބާރުއަޅާ ގޮތަށް ކަމަށާއި، މެދުއިރުމަތީގެ ހުރިހާ ފަރާތްތަކަކުންވެސް ސުލްހައިގެ މަޝްވަރާތަކަށް އެއްބާރުލުން ދިނުމަށް ގޮވާލައްވާ ކަމަށެވެ. އަދި ލުބުނާނާއި، ހިޒްބުالله އަދި އިސްރާއީލް ހިމެނޭހެން ހުރިހާ ފަރާތްތަކަކުން ހަނގުރާމަ ހުއްޓާލުމަކަށް އެމަނިކުފާނު އުންމީދު ކުރައްވާ ކަމަށް ވިދާޅުވިއެވެ.

ނަމަވެސް، އިސްރާއީލުން ލުބުނާނަށް ދެމުންދާ ހަމަލާތަކުގެ ސަބަބުން މަޝްރަޙު ވަނީ އިތުރަށް ގޯސްވެފައެވެ. އީރާނުން ބުނަމުންދަނީ ލުބުނާނަށް ހަމަލާދެމުންދާހާ ހިނދަކު ހަނގުރާމަ ހުއްޓާލުމުގެ އެއްބަސްވުމެއްގައި ސޮއިނުކުރާނެ ކަމަށެވެ. މި ސަބަބާހުރެ، އެމެރިކާއާއި އީރާނާ ދެމެދު ބޭއްވުމަށް ހަމަޖެހިފައި އޮތް ފަންނީ މަޝްވަރާތައްވެސް މިހާރު ވަނީ ފަސްކުރަން ޖެހިފައެވެ.

އިސްރާއީލުން ލުބުނާނަށް ދިން އެންމެ ފަހުގެ ހަމަލާތަކުގައި އެތައް ބަޔަކު ޝަހީދުވެފައިވާއިރު، މިއީ އެމެރިކާއިން ކުރިއަށްގެންދާ ސުލްހައިގެ މަސައްކަތްތަކަށް އިސްރާއީލުން ކުރިމަތިކުރި ގޮންޖެހުމެއްގެ ގޮތުގައި މުހައްލިލުން ސިފަކުރެއެވެ. އެހެންކަމުން، ސަރަހައްދީ ހަމަޖެހުން ގާއިމުކުރުމަށްޓަކައި ނަތަންޔާހޫގެ ހަރުކަށި ސިޔާސަތުތައް ކޮންޓްރޯލްކުރުމަށް ޓްރަމްޕްގެ ސަރުކާރަށް މިހާރު ވަނީ ބޮޑެތި ފިއްތުންތަކެއް ކުރިމަތިވެފައެވެ.