އިޒްރޭލުގެ އަސްކަރިއްޔާއިން ރޭގަނޑުގެ ވަގުތުތަކުގައި ލުބުނާނުގެ ހިޒްބުالله ޖަމާއަތުގެ 80 އަށްވުރެ ގިނަ އަމާޒުތަކަށް ވަރުގަދަ ވައިގެ ހަމަލާތަކެއް ދީފިއެވެ. އިޒްރޭލުން ހާމަކޮށްފައިވާ ގޮތުގައި މި ހަމަލާތަކުގައި އެ ޖަމާއަތުގެ އެތައް ދަހަ ހަނގުރާމަވެރިންނެއް ވަނީ މަރުވެފައެވެ.

އިޒްރޭލު ސިފައިންގެ އެންމެ ފަހުގެ މައުލޫމާތުތަކަށް ބަލާއިރު، މި ހަމަލާތައް އަމާޒުކޮށްފައިވަނީ ލުބުނާނުގެ ދެކުނުގައިވާ ނަބަޓިއޭ ސަރަހައްދަށާއި އެހެނިހެން ބައެއް ސަރަހައްދުތަކަށެވެ. މީގެ ތެރޭގައި ހިޒްބުاللهގެ ހަނގުރާމަވެރިން ތިބި ތަންތަނާއި، ކޮމާންޑް ސެންޓަރުތަކާއި، ރޮކެޓް އުދުއްސާލާ މަގާމުތަކުގެ އިތުރުން އެ ޖަމާއަތުގެ އިންފްރާސްޓްރަކްޗަރ ހިމެނޭ ތަންތަން ހިމެނެއެވެ.

އިޒްރޭލު އަސްކަރިއްޔާއިން އިތުރަށް ބުނެފައިވަނީ، ލުބުނާނުގެ ދެކުނުގައި ކުރިއަށްގެންދާ މި އޮޕަރޭޝަން މެދުނުކެނޑި ކުރިއަށްދާނެ ކަމަށެވެ. މިގޮތުން ބޯފޯޓް ސަރަހައްދުގައިވާ ހިޒްބުاللهގެ "ސްޓްރެޓީޖިކް ބިންގަރާސްތައް" ނައްތާލުމަށް ހާއްސަ އިސްކަމެއް ދޭނެ ކަމަށްވެސް އެގައުމުން ބުނެފައިވެއެވެ.

މީގެ އިތުރުން، ލުބުނާނުގެ ބިގާ ވެލީ ސަރަހައްދުގައި ހުރި ހިޒްބުاللهގެ ދެ ކޮމާންޑް ސެންޓަރަކަށްވެސް ދާދި ފަހުން ހަމަލާދީފައިވާނެ ކަމަށް އިޒްރޭލުން ވަނީ ކަށަވަރުކޮށްދީފައެވެ. އިޒްރޭލުގެ މި އުދުވާނީ ހަމަލާތަކުގެ ސަބަބުން މުޅި ސަރަހައްދުގެ މަސްރަހު ވަނީ އިތުރަށް ނުތަނަވަސްވެފައެވެ.