ދ. މީދޫ ކައުންސިލްގެ ރައީސަކު ހޮވުމަށް އިއްޔެ ބޭއްވި އިންތިހާބުގައި ސަރުކާރު ހިންގާ ޕީއެންސީގެ ކެންޑިޑޭޓަށް ލިބުނު ބޮޑު ކާމިޔާބީ ފާހަގަކުރެއްވުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު މިއަދު އެރަށަށް ވަޑައިގެންފިއެވެ.

މީދޫ ކައުންސިލްގެ ރައީސް ހޮވުމަށް އިއްޔެ އިންތިހާބު ބާއްވަން ޖެހުނީ، މިދިޔަ އޭޕްރީލް މަހު ބޭއްވި ކައުންސިލް އިންތިހާބުގެ ނަތީޖާއާ ގުޅިގެން ހައިކޯޓުން ކުރި ހުކުމަށްފަހު އަލުން ވޯޓު ގުނުމުން، ޕީއެންސީގެ ކެންޑިޑޭޓް ސުހާ އިބްރާހިމާއި އެމްޑީއޭގެ ކެންޑިޑޭޓް މުހައްމަދު ޝާހިދަށް ލިބުނު ވޯޓު އެއްވަރުވުމާ ގުޅިގެންނެވެ. ކުރިން ބޭއްވި އިންތިހާބުގައި ސުހާއަށް ލިބުނު ވޯޓެއް ބާއިލުވުމުގެ ސަބަބުން ދެ ކެންޑިޑޭޓުން އެއްވަރުވެ، ގޮނޑީގެ މިލްކުވެރިކަމާ މެދު ވަނީ ގާނޫނީ ބަހުސްތަކެއް އުފެދިފައެވެ.

އިއްޔެ ބޭއްވި ފޯރިގަދަ އިންތިހާބުގައި ޕީއެންސީގެ ކެންޑިޑޭޓް ސުހާ އިބްރާހިމް ވަނީ 80 ވޯޓުގެ ތަފާތުން ޝާހިދުގެ މައްޗަށް ކުރި ހޯއްދަވާފައެވެ. މި އިންތިހާބުގެ ވަގުތީ ނަތީޖާ ދައްކާގޮތުން ސުހާއަށް 529 ވޯޓު ލިބިވަޑައިގެންނެވިއިރު، ޝާހިދަށް ލިބިފައިވަނީ 449 ވޯޓެވެ. މި އިންތިހާބުގައި ވޯޓުލުމުގެ ހައްގު ލިބިފައިވާ 1،049 މީހުންގެ ތެރެއިން 985 މީހަކު ވަނީ ވޯޓުލާފައެވެ.

މި ކާމިޔާބީ ފާހަގަކުރެއްވުމަށް ރައީސްގެ ދެކަނބަލުން މީދޫއަށް ވަޑައިގަތުމުން، އެރަށުގެ ރައްޔިތުންގެ ފަރާތުން ވަނީ ވަރަށް ހޫނު މަރުހަބާއެއް ދަންނަވާފައެވެ. ރަށުގެ ބަނދަރު ސަރަހައްދަށް ކުދިބޮޑު ގިނަ އަދަދެއްގެ ބަޔަކު ޖަމާވެ، ރައީސްގެ ދެކަނބަލުންނަށް އިސްތިގުބާލު ކުރިއެވެ. ފާހަގަކޮށްލެވޭ ގޮތުގައި މީދޫއަކީ ފަސްޓް ލޭޑީ ސާޖިދާ މުހައްމަދުގެ މަންމާފުޅުގެ އުފަން ރަށެވެ. އަދި މި އިންތިހާބުގެ ކެމްޕޭން ހަރަކާތްތަކުގައިވެސް އެކަމަނާ ވަނީ އަމަލީގޮތުން ބައިވެރިވެވަޑައިގެންފައެވެ.

ޕީއެންސީގެ ފަރާތުން މިރޭ މީދޫގައި މި ކާމިޔާބީ ފާހަގަކުރުމަށް ހާއްސަ ހަފްލާއެއް ބޭއްވުމަށް ވަނީ ތައްޔާރުވެފައެވެ.