ތިރީސް އަހަރަށްވުރެ ގިނަ ދުވަހަށްފަހު އެމެރިކާގެ ފަސްގަނޑުގައި ބާއްވާ ފުރަތަމަ ފީފާ ވޯލްޑް ކަޕްގެ ފުރަތަމަ މެޗުގައި، އެމެރިކާއިން ޕެރަގުއޭގެ މައްޗަށް 4-1 ގެ ބޮޑު މޮޅެއް ހޯދައިފިއެވެ.

ލޮސް އެންޖެލިސް ސްޓޭޑިއަމްގައި މިއަދު ހެނދުނު ކުޅުނު މި މެޗުގައި، އެމެރިކާގެ ޓީމުން ވަނީ މުޅި މެޗު ކަހަލަ ގޮތަކަށް ޑޮމިނޭޓްކޮށްފައެވެ. މިއީ ވޯލްޑް ކަޕްގެ ތާރީޚުގައި އެމެރިކާގެ ޓީމަކުން އެއް މެޗެއްގައި ތިން ލަނޑަށްވުރެ ގިނަ ލަނޑު ޖެހި ފުރަތަމަ ފަހަރެވެ.

މެޗުގެ ފުރަތަމަ ލަނޑު 7 ވަނަ މިނެޓުގައި ފެނިގެންދިޔައީ ޕެރަގުއޭގެ ޑިފެންޑަރު ޑޭމިއަން ބޮބަޑިއްލާ އަތުން ބައިކޮޅަށް ވަން ލަނޑަކުންނެވެ. އޭގެ ފަހުން އެމެރިކާގެ ފޯވާޑް ފޮލާރިން ބަލޯގަން ވަނީ މެޗުގެ 31 ވަނަ މިނެޓުގައާއި ފުރަތަމަ ހާފުގެ އިތުރު ވަގުތުގެ ތެރޭގައި ދެ ލަނޑު ޖަހައި، ޓީމަށް ބޮޑު ލީޑެއް ހޯދައިދީފައެވެ. ބަލޯގަން ވެފައިވަނީ 1930 ވަނަ އަހަރަށްފަހު ވޯލްޑް ކަޕް މެޗެއްގައި ދެ ލަނޑު ޖެހި ފުރަތަމަ އެމެރިކާ ކުޅުންތެރިޔާއަށެވެ.

ޕެރަގުއޭގެ ހަމައެކަނި ލަނޑު 73 ވަނަ މިނެޓުގައި ކާމިޔާބުކޮށްދިނީ މައުރީސިއޯއެވެ. ނަމަވެސް މެޗު ނިމެން ކައިރިވެފައިވަނިކޮށް، ބަދަލު ކުޅުންތެރިއެއްގެ ގޮތުގައި ކުޅެން އެރި ޖިއޯ ރޭނާ ވަނީ އެމެރިކާގެ ހަތަރުވަނަ ލަނޑު ޖަހައިދީފައެވެ.

މެޗަށްފަހު ވާހަކަދައްކަމުން އެމެރިކާގެ ތަރި ކްރިސްޓިއަން ޕުލިސިޗް ބުނީ، ފުރަތަމަ ހާފުގައި އޭނާގެ ފަޔަށް ކުޑަ އަނިޔާއެއް ލިބުމުން ރައްކާތެރިކަމުގެ ފިޔަވަޅެއްގެ ގޮތުން ދެވަނަ ހާފުގައި ނުކުޅެ މަޑުކުރީ ކަމަށެވެ. ކޯޗު މައުރީސިއޯ ޕޮޗެޓީނޯ ބުނިގޮތުގައި ކުރިއަށް އޮތް މެޗުތަކުގައި ޕުލިސިޗް ފެނުމުގެ ފުރުސަތު ބޮޑެވެ.

ގްރޫޕް ޑީގައި ހިމެނޭ އެމެރިކާގެ ދެން އޮތް މެޗު އޮންނާނީ އަންނަ ހުކުރު ދުވަހު ސިއެޓްލްގައި އޮސްޓްރޭލިއާއާ ދެކޮޅަށެވެ. އަދި ގްރޫޕް ސްޓޭޖުގެ ފަހު މެޗުގައި ޖޫން 25 ގައި އެމެރިކާ ނުކުންނާނީ ތުރުކީއާ ދެކޮޅަށެވެ. މިއަހަރުގެ ވޯލްޑް ކަޕްގައި 48 ޓީމު ވާދަކުރާތީ، މި މޮޅާއެކު އެމެރިކާއަށް ނޮކައުޓް ބުރަށް ދިއުމުގެ ފުރުސަތު މިހާރު ވަނީ ވަރަށް ބޮޑަށް ތަނަވަސްވެފައެވެ.