ޣައްޒާގެ އެތައް ތަނަކަށް ޔަހޫދީން މިއަދު ވެސް ޙަމަލާޔައް ދެމުންދާ ކަމަށް ޣައްޒާގެ މަސްދަރުތަކުން ބުނެފިއެވެ.

މިއަދު މިވަގުތާއި ހަމަޔަށް އެކަކު ޝަހީދުވެ އެތައް ބަޔަކު ޒަޚަމް ވެފައިވާއިރު ޣައްޒާގެ ނޫސެއިރާތު ކޭމްޕާއި ޒައިތޫން އަވަށް އަދި ޣައްޒާގެ ބެއިޓް ލާހިއާ އަށް އަމާޒުކޮށް ޙަމަލާ ދެމުން ގެންދާ ކަމަށް މަސްދަރުތަކުން ބުނެއެވެ.

މެޑިކަލް މަސްދަރުތަކުން ބުނާ ގޮތުގައި ޣައްޒާގެ މެދުތެރޭގައި އޮންނަ ނޫސެއިރާތު ކޭމްޕުގެ އުތުރުގައި އޮންނަ މިސްރުގެ ކޭމްޕާ ދިމާލުގައި ހުރި ރެސިޑެންޝަލް އެޕާޓްމަންޓަކަށް އިސްރާއީލު ސިފައިން ވަނީ ބޮން ވެސް އަޅާފައެވެ.

އަދި ޣައްޒާ ސިޓީގެ އިރުދެކުނު ސަރަހައްދުގައި އޮންނަ އަލްޒައިތޫން ސަރަހައްދުގައި ގިނަ ޙަމަލާތައް ދެމުން ގެންދަނީ ޑްރޯން ގައި ބޮން ހަރުކޮށްގެން ކަމަށް މަސްދަރުން ބުނެއެވެ.

މީބެ އިތުރުން ޣައްޒާގެ އުތުރުން އޮންނަ ބެއިތު ލާހިޔާ ސިޓީގެ އަލްސަލަތީން ސަރަހައްދުގައި ބަޑިޖަހައި އަންހެނަކަށް ވެސް ވަނީ ސީރިއަސް އަނިޔާތަކެއް ލިބިފައެވެ.

އިޒުރޭލުން ގެންދަނީ ޣައްޒާގެ ނަސްލު ނައްތާލުމުގެ މަސައްކަތް ހުއްޓުމެއް ނެތި ކުރަމުން ކަމަށް ޙަމާސް އިން ތުހުމަތު ކުރެއެވެ.