ލުބުނާނުގެ ދެކުނު ސަރަހައްދުގައި ހިފާފައިވާ ބިންތަކުން ޔަހޫދީ އިޒްރޭލުގެ ސިފައިން ފޭބުމަށް ލުބުނާނު ސަރުކާރުން ހުށަހެޅި ހުށަހެޅުމަށް އިޒްރޭލުން ދެކޮޅު ހަދައިފިއެވެ.

ލުބުނާނުގެ ދެކުނު ބޯޑަރު ސަރަހައްދުގައި މިހާރު ހިނގަމުންދާ ހަމަނުޖެހުންތަކަށް ހައްލެއް ހޯދުމަށް މަސައްކަތްކުރާ މެދުވެރިން މެދުވެރިކޮށް ލުބުނާނުން ވަނީ އިޒްރޭލުގެ ސިފައިން އެ ސަރަހައްދުން އެއްކޮށް ފޭބުމަށް ޝަރުތު ކޮށްފައެވެ. ނަމަވެސް، އިޒްރޭލުން ވަނީ މި ޝަރުތު ގަބޫލުކުރަން އިންކާރުކޮށް، އެ ގައުމުގެ އުދުވާނީ ސިފައިން އެ ސަރަހައްދުގައި ދެމިތިބޭނެ ކަމުގެ އިޝާރާތެއް ދީފައި ކަމަށް މަސްދަރުތަކުން ބުނެއެވެ.

މި ހުށަހެޅުން ލުބުނާނުން ހުށަހެޅީ އެ ގައުމުގެ ސިޔާދަތީ މިނިވަންކަން ކަށަވަރުކުރުމަށާއި، އިޒްރޭލުން ދެމުންދާ ހަމަލާތަކުގެ ސަބަބުން ހާލުގައި ޖެހިފައިވާ ރައްޔިތުންނަށް ރައްކާތެރިކަން ހޯދައިދިނުމުގެ ބޭނުމުގައެވެ. ނަމަވެސް، އިޒްރޭލުން ބުނަމުންދަނީ އެމީހުން އެ ސަރަހައްދުގައި ތިބީ ސަލާމަތީ ސަބަބުތަކަށްޓަކައި ކަމަށެވެ. މިއީ އިޒްރޭލުން އަބަދުވެސް ބިންތައް ފޭރިގަތުމަށް ދައްކާ ބަހަނާއެކެވެ.

ލުބުނާނުގެ ދެކުނުގައި އދ. އިން ކަނޑައަޅާފައިވާ "ބްލޫ ލައިން" ސަރަހައްދުގައި އިޒްރޭލުން ދަނީ ބައިނަލްއަގުވާމީ ގާނޫނުތަކާ ހިލާފަށް ޔެލޯލައިނެއް ގާއިމްކޮށް އުދުވާނުތައް ހިންގަމުންނެވެ. މި ޔެލޯ ލައިނަކީ ޣައްޒާގައި އެޅިފަދަ ލައިނެކެވެ.

އިޒްރޭލުން ލުބުނާނުގެ ހުށަހެޅުމަށް ދެކޮޅު ހެދުމާއެކު، އެ ސަރަހައްދުގައި އޮތް ނުތަނަވަސްކަން އިތުރަށް ބޮޑުވެ، ހަނގުރާމަ ފުޅާވެގެން ހިނގައިދާނެ ކަމުގެ ބިރު މިވަނީ އިތުރުވެފައެވެ.

މި މައްސަލައިގައި ލުބުނާނު ސަރުކާރުން ބުނަމުންދަނީ، އިޒްރޭލުގެ އިސްތިއުމާރީ ސިފައިން ލުބުނާނުގެ ބިންތަކުން ފައިބައިގެން ނޫނީ އެ ސަރަހައްދުގައި ދާއިމީ ސުލްހައެއް ގާއިމު ނުކުރެވޭނެ ކަމަށެވެ. އިޒްރޭލުގެ މި ނިންމުމަކީ މެދުއިރުމަތީގައި ސުލްހަ ގާއިމުކުރުމަށް ބައިނަލްއަގުވާމީ މުޖުތަމައުން ކުރަމުންދާ މަސައްކަތްތަކަށް އެޅުނު ވަރަށް ބޮޑު ހުރަހެކެވެ.