ދުނިޔޭގެ އެންމެ އަގުބޮޑު ފުޓްބޯޅަ މެޗުގެ ގޮތުގައި ބެލެވޭ ޗެމްޕިއަންޝިޕް ޕްލޭ-އޮފް ފައިނަލްގައި މިޑްލްސްބަރާ (ބޯރޯ) ބަލިކޮށް، ހަލް ސިޓީން އަލުން އިނގިރޭސި ޕްރިމިއާ ލީގަށް ކޮލިފައިވެއްޖެއެވެ.
ވެމްބްލީ ސްޓޭޑިއަމްގައި ކުޅުނު މި ފޯރިގަދަ މެޗު ހަލް ސިޓީން ކާމިޔާބުކުރީ 1-0 ގެ ނަތީޖާއަކުންނެވެ. މެޗުގެ ހަމައެކަނި ލަނޑު، އިތުރު ވަގުތުގެ ފަސްވަނަ މިނެޓުގައި ކާމިޔާބުކޮށްދިނީ އެ ޓީމުގެ އިތުބާރު ފޯވާޑް އޮލީ މެކްބާނީއެވެ. މިއީ މި ސީޒަނުގައި އޭނާ ކާމިޔާބުކުރި 19 ވަނަ ލަނޑެވެ.
މި ލަނޑު ފެނިގެންދިޔައީ ހަލްގެ ބަދަލު ކުޅުންތެރިޔާ ޔޫ ހިރަކާވާ ފޮނުވާލި ހުރަހެއް، މިޑްލްސްބަރާގެ ކީޕަރު ސޯލް ބްރިން އަތުން ކަސިޔާރުވެގެން އައި ވަގުތު މެކްބާނީ ވަރަށް ހުށިޔާރުކަމާއެކު ގޯލުގެ ތެރެއަށް ބޯޅަ ފޮނުވާލައިގެންނެވެ. މި މޮޅާއެކު ޕްރިމިއާ ލީގަށް ކޮލިފައިވުމުން ހަލް ސިޓީއަށް ގާތްގަނޑަކަށް 200 މިލިއަން ފައުންޑްގެ އާމްދަނީއެއް ލިބޭނެއެވެ.
Advertisement
މި ކާމިޔާބީއާއެކު ހަލް ސިޓީގެ ވެރިޔާ އަކުން އިލިކާލީ ވަނީ އުފަލުން ރޮއެފައެވެ. މިއީ އެ ކްލަބަށް ފާއިތުވި 12 މަސްދުވަހު ކުރިމަތިވި ގޮންޖެހުންތަކަށް ފަހު ލިބުނު ބޮޑު ކާމިޔާބީއެކެވެ. މިދިޔަ ސީޒަނުގައި ރެލިގޭޝަނުން ކިރިޔާ ސަލާމަތްވި ހަލް ސިޓީން، މި ސީޒަނުގައި ކޯޗު ސާޖޭ ޔަކީރޮވިޗްގެ އިރުޝާދުގެ ދަށުން ވަނީ ތަފާތު މޮޅު ކުޅުމެއް ދައްކާފައެވެ.
މިޑްލްސްބަރާއަށް މި މެޗަކީ ހިތްދަތި ނަތީޖާއެކެވެ. ވެމްބްލީގައި މިޑްލްސްބަރާ ކުޅުނު ހަވަނަ މެޗުންވެސް އެ ޓީމަށް މޮޅެއް ނުލިބި، އެ ޓީމުގެ "ވެމްބްލީ ކާސް" ނުވަތަ ސުންޕާކަން ވަނީ ދެމިގެން ގޮސްފައެވެ. ސައުތެމްޕްޓަން ސަސްޕެންޑްވުމާ ގުޅިގެން ފައިނަލުން ފުރުސަތު ލިބުނު ނަމަވެސް، މައިކަލް ހެލްބާގްގެ ޓީމަށް ޕްރިމިއާ ލީގުގެ ޖާގަ ކަށަވަރު ކުރެވޭ ގޮތެއް ނުވިއެވެ.
މެޗުގެ ބޮޑު ބައިގައި ބޯޅަ ހިފަހައްޓައިގެން މިޑްލްސްބަރާއިން ކުޅުނު ނަމަވެސް، ހަލް ސިޓީން ވަނީ ވަރުގަދަ ޑިފެންސަކާއެކު ކައުންޓަރ އެޓޭކުގައި ނުރައްކާކޮށްފައެވެ. މެޗުގެ ފަހުކޮޅު މިޑްލްސްބަރާގެ ތަރި ހޭޑަން ހެކްނީ ކުޅެން އެރި ނަމަވެސް، އެ ޓީމަށް ލަނޑެއް ކާމިޔާބެއް ނުކުރެވުނެވެ. އަދި މެޗުގެ ތެރެއިން އޮސްޓްރޭލިއާގެ ރައިލީ މެކްގްރީއަށް އަނިޔާވުމަކީ ވޯލްޑް ކަޕްގެ ކުރިން އެ ޓީމަށް ލިބުނު އިތުރު ހާސްކަމެކެވެ.
މި މޮޅާއެކު ހަލް ސިޓީ ތިންވަނަ ފަހަރަށް ޕްލޭ-އޮފް ކާމިޔާބުކޮށް އިނގިރޭސި ފުޓްބޯޅައިގެ އެންމެ މަތީ ފަންތިއަށް އެނބުރި ދާއިރު، މިޑްލްސްބަރާއަށް ޖެހޭނީ އަންނަ ސީޒަނުގައިވެސް ޗެމްޕިއަންޝިޕްގައި ވާދަކުރާށެވެ.
