އިރާގުން އީރާނަށް ހަތިޔާރު އެތެރެކުރަން އުޅުނު ބަޔަކު އަތުލައިގަނެފި ކަމަށް އީރާނުގެ ސަލާމަތީ މަސްދަރުތަކުން ބުނެފިއެވެ.

އީރާނުގެ ސަލާމަތީ ބާރުތަކުން ބުނާ ގޮތުގައި، އެމެރިކާ އާއި އިޒްރޭލަށް ވާގިވެރިވާ ބަޔަކު އުތުރު އިރާގުގެ ބޯޑަރު ހުރަސްކޮށް އީރާނަށް ގިނަ އަދަދެއްގެ ހަތިޔާރު އެތެރެކުރަން ކުރި މަސައްކަތެއް ވަނީ ނާކާމިޔާބު ކޮށްލާފައެވެ.

މި ހަތިޔާރުތައް އަތުލާފައި ވަނީ އީރާނާއި އުތުރު އިރާގު ގުޅޭ ބޯޑަރު ސަރަހައްދުގައެވެ. އީރާނުގެ ރަސްމީ ފަރާތްތަކުން ހާމަކުރި ގޮތުގައި، މި ހަތިޔާރުތަކަކީ އެމެރިކާގައި އުފައްދާފައިވާ ވަޒަނާއި ޒަމާނީ ހަތިޔާރުތަކެކެވެ. މި ތަކެތި އެތެރެކުރަން އުޅުނީ އެމެރިކާ އާއި ޒަޔަނިސްޓުންގެ އެދުމުގެ މަތިން، އީރާނުގެ ދާޚިލީ ހަމަޖެހުން ނަގާލުމަށް ކަމަށް ތެހެރާނުން ވަނީ ތުހުމަތުކޮށްފައެވެ.

އައިއާރްޖީސީން އަތުލައިގަތް ހަތިޔާރުތަކުގެ ތެރޭގައި 200 ބޮން ވެސް ހިމެނޭ ކަމަށް މަސްދަރުތައް ބުނެއެވެ.

މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދޭން އުޅުނު ހަމަލާތައް މަޑުޖައްސާލާފައިވާ ކަމަށްވެސް ބައެއް ޚަބަރުތައް ބުނެއެވެ. ނަމަވެސް ޓްރަމްޕް އިޢުލާން ކުރެއްވި ގޮތުގައި ދޭން އުޅުނު ހަމަލާ ކެންސަލް ކޮށްފައި ވަނީ ޤަލްފުގެ “ރައްޓެހިން ބުނެގެން”ނެވެ.