ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަށް އަލަށް އިންތިހާބުވި މެމްބަރުން އިއްޔެ ހުވާކުރެއްވުމާ ގުޅިގެން، އދ. މަހިބަދޫ ކައުންސިލްގެ ނައިބު ރައީސަކު ހޮވުމަށް ބޭއްވި ޖަލްސާ ނަތީޖާއެއް ނުނިކުމެ ނިންމާލަން ޖެހިއްޖެ އެވެ.

އިއްޔެ ބޭއްވި މި ޖަލްސާގައި ނައިބު ރައީސަކު ހޮވުމަށްޓަކައި ހަ ފަހަރު މަތިން ވޯޓު ނެގި ނަމަވެސް، ކޮންމެ ފަހަރަކުވެސް ވޯޓުގެ ނަތީޖާ އެއްވަރުވުމުގެ ސަބަބުން ނައިބު ރައީސަކު ހޮވޭގޮތް ވަނީ ނުވެފަ އެވެ.

މައުލޫމާތު ލިބިފައިވާ ގޮތުގައި، މަހިބަދޫ ކައުންސިލްގެ ނައިބު ރައީސްކަމަށް ތިން ކެންޑިޑޭޓަކު ވާދަކުރެއްވި އެވެ. އެއީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އިތުރުން އަމިއްލަ ގޮތުން އިންތިހާބުވި މެންބަރެކެވެ.

އެންމެ ފުރަތަމަ ނެގި ވޯޓުގައި އެމްޑީޕީގެ ކައުންސިލަރު ޒައީމާ މުހައްމަދަށް 2 ވޯޓު ލިބިވަޑައިގަތްއިރު، ސަރުކާރު ހިންގާ ޕީއެންސީގެ ކައުންސިލަރު މުހައްމަދު މައުމޫނަށްވެސް ލިބިވަޑައިގަތީ 2 ވޯޓެވެ. އަދި އަމިއްލަ ގޮތުން އިންތިހާބުވި ބުންޔާމީން ހަސަނަށް ލިބިވަޑައިގަތީ 1 ވޯޓެވެ.

ފުރަތަމަ ވޯޓަށްފަހު، ދެން އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ފަސް ފަހަރު މަތިން ވޯޓު ނެގުނެވެ. ނަމަވެސް، ކޮންމެ ފަހަރަކުވެސް އެމްޑީޕީ އަދި ޕީއެންސީގެ ކައުންސިލަރުންނަށް ލިބިވަޑައިގަތީ ދެ ވޯޓެވެ. މިގޮތަށް ދިމާވީ ވޯޓުލުމުގައި ބައިވެރިވި މެންބަރުންގެ ތެރެއިން އެއް ވޯޓު ބާތިލުވުމުގެ ސަބަބުންނެވެ.

މި މައްސަލައާ ގުޅިގެން ނައިބު ރައީސަކު ހޮވުމުގެ މަސައްކަތް މިވަގުތަށް ވަނީ ހުއްޓިފަ އެވެ. ކައުންސިލްގެ ނައިބު ރައީސަކު ހޮވުމާ މެދު ދެން އަމަލުކުރާނެ ގޮތެއް ކައުންސިލުން އަދި ހާމަކޮށްފައެއް ނުވެ އެވެ.