ކުޑަކުދިންތަކަކަށް ޖިންސީ ގޯނާކުރިކަން ސާބިތުވެ، ގއ. ކަނޑުހުޅުދޫ މީހަކު 15 އަހަރު ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލާގައި ކުށް ސާބިތުވެ ޖަލު ހުކުމެއް އައީ ގއ. ކަނޑުހުޅުދޫ / މުރަކަ، ޝަރަފު އިސްމާއިލް (43އ) ގެ މައްޗަށެވެ. އޭނާގެ މައްޗަށް މި ދައުވާ އުފުލާފައި ވަނީ ކުޑަކުދިންނަށް ޖިންސީ ގޯނާކުރާ މީހުންނާއި މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުންނެވެ.
ފުލުހުންގެ ތަހުގީގަށް ފަހު ޕްރޮސެކިއުޓާ ޖެނެރަލްގެ އޮފީހުން ކޯޓަށް ހުށަހެޅި މި މައްސަލައިގެ ހުކުމް އިއްވާފައި ވަނީ މިދިޔަ މަހުގެ 30 ވަނަ ދުވަހު އެވެ. ކްރިމިނަލް ކޯޓުން މި ހުކުމް އިއްވީ މައްސަލާގައި ހުށަހެޅުނު ހެކިތަކަށާއި ގާނޫނީ ބަހުސްތަކަށް ރިއާޔަތްކުރުމަށް ފަހު، ޝަރަފު އިސްމާއިލްގެ މައްޗަށް ކުށް ސާބިތުވާކަމަށް ކަނޑައެޅުމަށްފަހުގަ އެވެ.
މި މައްސަލައާއި ގުޅޭގޮތުން ފުލުހުން ބުނީ، މިއީ ރާއްޖެއަކީ އަމާން އަދި ކުށް މަދު މުޖުތަމައެއްގެ ގޮތުގައި ބޭއްވުމަށް ފުލުހުން ކުރަމުންދާ މެދުކެނޑުމެއްނެތް މަސައްކަތްތަކަށް ލިބުނު ކުރިއެރުމެއް ކަމަށެވެ. އަދި މިފަދަ މައްސަލަތައް ތަހުގީގުކޮށް އިންސާފާ ހަމައަށް ވާސިލުވުމުގައި ދައުލަތުގެ އެކި މުއައްސަސާތަކުން ދެމުންދާ އެއްބާރުލުން ފުލުހުން ވަނީ ފާހަގަކޮށްފަ އެވެ.
ޖިންސީ ގޯނާގެ މައްސަލަތަކަކީ މުޖުތަމައުގެ ރައްކާތެރިކަމާ ގުޅިފައިވާ ނުރައްކާތެރި ކުށްތަކަކަށް ވާއިރު، މިފަދަ ހުކުމްތަކުގެ ސަބަބުން ކުށްކުރާ ފަރާތްތަކަށް ގާނޫނީ އަދަބު ލިބި، އަނިޔާ ލިބޭ ފަރާތްތަކަށް އިންސާފު ގާއިމުވެގެންދާނެ ކަމަށް ފުލުހުން ބުންޏެވެ.
