ރައީސުލްޖުމްހޫރިއްޔާ މުހައްމަދު މުއިއްޒާއި، އެމަނިކުފާނުގެ އަނބިކަނބަލުން ސާޖިދާ މުހައްމަދު، ސްރީލަންކާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، މިއަދު ކޮލަމްބޯ ނޭޝަނަލް މިއުޒިއަމަށް ޒިޔާރަތްކުރައްވައިފި އެވެ.
ރައީސުލްޖުމްހޫރިއްޔާގެ ދެކަނބަލުން މިއުޒިއަމަށް ވަޑައިގަތުމުން، އެތަނުގެ އިސްވެރިން ވަނީ އެ ދެކަނބަލުންނަށް ވަރަށް ހޫނު މަރުހަބާއެއް ދަންނަވާފަ އެވެ. މި ޒިޔާރަތުގައި، މިއުޒިއަމްގެ އެކި ގެލެރީތައް ބައްލަވާލެއްވުމަށް ރައީސުލްޖުމްހޫރިއްޔާގެ ދެކަނބަލުންނަށް ހާއްސަ ޓުއާއެއް ދީފައިވެ އެވެ. މި ޓުއާގައި ސްރީލަންކާގެ މުއްސަނދި ތާރީހާއި، ސަގާފީ ތަރިކަ އަދި އާދަކާދަތައް ދައްކުވައިދޭ ތަފާތު މައުރަޒުތައް އެ ދެކަނބަލުން ބައްލަވާލެއްވި އެވެ.
މި ޒިޔާރަތުގެ ތެރެއިން ރައީސުލްޖުމްހޫރިއްޔާ ވަނީ މިއުޒިއަމްގެ މެހުމާނުންގެ ފޮތުގައި ސޮއިކުރައްވާފަ އެވެ. އެމަނިކުފާނު ލިޔުއްވި ބަޔާނުގައި، ގައުމުގެ ތާރީހީ ތަރިކަ އަންނަން އޮތް ޖީލުތަކަށް ރައްކާތެރިކޮށް، ދައްކައިދިނުމަށް ކުރަމުންދާ މަސައްކަތްތަކަށް ތައުރީފު ކުރެއްވި އެވެ. އަދި ފަސްޓް ލޭޑީ ސާޖިދާ މުހައްމަދު ވެސް ވަނީ މެހުމާނުންގެ ފޮތުގައި ސޮއިކުރައްވައި، އެ ގައުމުގެ އައިޑެންޓިޓީ ބައްޓަންކުރުމުގައި ދައުރު އަދާކުރި ތާރީހީ ވާހަކަތަކާއި، އާދަކާދަތަކާއި، ފަންނުވެރިކަމުގެ މުހިންމުކަން ފާހަގަކުރައްވާފައެވެ.
މިފަދަ ސަގާފީ ޒިޔާރަތްތަކަކީ ދެ ގައުމުގެ ދެމެދުގައި އޮންނަ ޒަމާންވީ އަދި ގާތް ގުޅުން އިތުރަށް ބަދަހިކުރުމުގެ މަގްސަދުގައި ކުރިއަށްގެންދާ ހަރަކާތްތަކެކެވެ.
މީގެ އިތުރުން، ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅަކީ ދެ ގައުމުގެ ދެމެދުގައި އޮތް އިތުބާރާއި ރަހުމަތްތެރިކަމުގެ ގުޅުން އާ އުސްމިންތަކަކަށް ގެންދިއުމަށް މަގުފަހިވެގެންދާނެ ދަތުރުފުޅެއްކަން ދެ ގައުމުގެ ސަރުކާރުންވެސް ފާހަގަކުރައްވަ އެވެ. ހާއްސަކޮށް، ތަޢުލީމީ އަދި ސަގާފީ ދާއިރާއިން ގުޅުން ބަދަހިކުރުމަށް ކުރެވޭ މިފަދަ މަސައްކަތްތަކުގެ ސަބަބުން، ދެ ޤައުމުގެ ރައްޔިތުންގެ މެދުގައި އޮންނަ އެކުވެރިކަން އިތުރަށް ވަރުގަދަވެގެންދާނެ އެވެ.
ރައީސުލްޖުމްހޫރިއްޔާ ސްރީލަންކާއަށް ކުރައްވާ މި ފުރަމާނަ ދަތުރުފުޅަކީ އެމަނިކުފާނު މަގާމާ ހަވާލުވެވަޑައިގަތުމަށްފަހު އެ ގައުމަށް ކުރައްވާ ފުރަތަމަ ރަސްމީ ދަތުރުފުޅެވެ. މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނެވި އެވެ.
