އީރާނު މައްސަލަ ހައްލުކުރުމަށް ޕާކިސްތާނާއި ކުވެއިތުުން މަޝްވަރާ ކޮށްފިއެވެ. ޕާކިސްތާނުގެ ނައިބު ބޮޑުވަޒީރު އަދި ޚާރިޖީ ވަޒީރު އިސްހާގު ދާރު އާއި ކުވެއިތުގެ ޚާރިޖީ ވަޒީރު ޢަބްދުﷲ ޢަލީ އަލް-ޔަޙްޔާގެ މި މަޝްވަރާ ތައް އޮތީ ފޯނުކޯލު މެދުވެރިކޮށް ކަމަށް ޕާކިސްތާނުން ބުނެއެވެ.
މި މަޝްވަރާތަކުގައި ފަލަސްތީނުގެ ޣައްޒާގައި އިޒްރޭލުން ހިންގަމުންދާ ލާއިންސާނީ އުދުވާނުތަކުގެ ސަބަބުން ސަރަހައްދީ ހަމަޖެހުމަށް ކުރިމަތިވެފައިވާ ގޮންޖެހުންތަކާއި މެދު ވެސް މަޝްވަރާ ކޮށްފައިވާ ކަމަށާއި، އެމެރިކާ އާއި އީރާނާ ދެމެދު މެދުކެނޑިފައިވާ ނިއުކްލިއާ މަޝްވަރާތައް އަލުން ފެށުމަށް ކުރެވޭ މަސައްކަތްތަކާ ގުޅޭގޮތުންވެސް ދެ ބޭފުޅުން ވާހަކަފުޅު ދެއްކެވި ކަމަށް ދެ ޤައުމުން ވެސް ބުނެއެވެ.
އީރާނަށް އެމެރިކާ އިން ޙަމަލާ ދިނުމުގެ ސަބަބުން ބޮޑެތި ގެއްލުންތައް ލިބުނު އެއް ޤައުމަކީ ކުވެއިތެވެ. އީރާނުން ފޮނުވި ބަދަލު ހިފުމުގެ ހަމަލާތަކުގައި ކުވައިތުގެ އެތެރޭގައި ހުރި އަސްކަރީ މަރުކަޒުތަކަށާއި އިންފްރާސްޓްރަކްޗާތަކަށް ގެއްލުން ލިބުނު އިރު ސިފައިންނާއި އާންމުންގެ ބަޔަކު މަރުވެ އިތުރު އެތައް ބަޔަކު ވަނީ ޒަހަމްވެފަ އެވެ. އަދ ވައިގެ ދިފާއީ އޮޕަރޭޝަންތަކުގައި މަތިންދާބޯޓު ތައް ގޮއްވައިލުމުގެ ހާދިސާތައް ހިނގުމުގެ އިތުރުން ކުވައިތު އިންޓަނޭޝަނަލް އެއާޕޯޓަށް ޑްރޯން ހަމަލާދީ ޓާމިނަލްތަކަށާއި ރާޑަރ ސިސްޓަމްތަކަށާއި ފިއުލް އިންފްރާސްޓްރަކްޗަރަށް ބޮޑެތި ގެއްލުންތައް ލިބުނެވެ.
ޕާކިސްތާނަކީ އީރާނު-އެމެރިކާ މައްސަލަ ހައްލުކުރުމަށް އެންމެ ބޮޑެތި މަސައްކަތްތައް ކުރަމުން ގެންދާ ޤައުމެވެ. އެމެރިކާއާއި އީރާނާ ދެމެދު މުހިންމު މެދުވެރިއެއްގެ ގޮތުގައި ޕާކިސްތާނުން ދަނީ ބޮޑެތި ޑިޕްލޮމެޓިކް މަސައްކަތްތަކެއް ކުރަމުންނެވެ.
