އިނގިރޭސި ޕްރިމިއާ ލީގުގައި މިރޭ ކުޅުނު މެޗުތަކުން ތާވަލުގެ ކުރީގައި އުޅޭ އާސެނަލް އަދި ލިވަޕޫލް ވެސް މޮޅުވެއްޖެ އެވެ.
އަމިއްލަ ދަނޑުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން އާސެނަލް މޮޅުވީ 1-0 ގެ ނަތީޖާއަކުންނެވެ. ވަރަށް ވާދަވެރި ކުޅުމެއް ފެނިގެންދިޔަ މި މެޗުގެ ހަމައެކަނި ލަނޑު ފެނިގެންދިޔައީ މެޗުގެ ވަރަށް ކުރީކޮޅުގަ އެވެ. އެގޮތުން މެޗުގެ 9 ވަނަ މިނެޓުގައި ކައި ހަވާޓްޒް ތަނަވަސްކޮށްދިން ފުރުސަތަކުން، އޭރިއާ ބޭރުން ފޮނުވާލި ހަމަލާއެއް ގޯލުގެ ކަނަށް ވައްދާލައިގެން މި ލަނޑު ކާމިޔާބުކޮށްދިނީ އެބެރެޗީ އެޒޭ އެވެ.
މި މެޗުގައި ދެ ޓީމުގެ ފަރާތުން ވެސް ގޯލާ އަމާޒުކޮށް ނުރައްކާތެރި ހަމަލާތަކެއް ފޮނުވާލާފައިވެ އެވެ. އެގޮތުން ނިއުކާސަލުން ގޯލާ އަމާޒަށް ތިން ހަމަލާ ފޮނުވާލިއިރު، އާސެނަލުން ވަނީ ހަތަރު ހަމަލާއެއް ފޮނުވާލާފަ އެވެ. މި މޮޅާއެކު އާސެނަލް މިވަގުތު އޮތީ 73 ޕޮއިންޓާއެކު ތާވަލުގެ އެއްވަނައިގަ އެވެ. ނަމަވެސް އެއީ ވާދަވެރި ޓީމުތަކަށްވުރެ އިތުރަށް އެއް މެޗު ކުޅެގެންނެވެ. މި މެޗުން ބަލިވި ނިއުކާސަލް އޮތީ ތާވަލުގެ 14 ވަނައިގަ އެވެ.
Advertisement
ލީގުގައި މިރޭ ކުޅުނު އަނެއް މެޗުގައި ލިވަޕޫލުން ވަނީ 3-1 ގެ ނަތީޖާއަކުން ކްރިސްޓަލް ޕެލަސް ބަލިކޮށްފަ އެވެ. މިއީ މި ސީޒަނުގައި މީގެ ކުރިން ތިން ފަހަރު ޕެލަސް އަތުން ބަލިވެފައިވާ ލިވަޕޫލަށް ލިބުނު މުހިންމު ބަދަލު ހިފުމެކެވެ.
ލިވަޕޫލްގެ ފުރަތަމަ ލަނޑު، އެލެކްސިސް މެކް އެލިސްޓާގެ އެހީތެރިކަމާއެކު ކާމިޔާބުކޮށްދިނީ އެލެގްޒެންޑަރ އިސާކް އެވެ. އޭގެ ފަހުން އެންޑީ ރޮބަޓްސަން ލިވަޕޫލްގެ ދެވަނަ ލަނޑު ކާމިޔާބުކުރިއިރު، މެޗުގެ ފަހު ވަގުތު ފްލޯރިއަން ވާޓްޒް ވަނީ އެ ޓީމުގެ ތިންވަނަ ލަނޑު ޖަހައި މޮޅު ކަށަވަރުކޮށްދީފަ އެވެ. ކްރިސްޓަލް ޕެލަސްގެ ހަމައެކަނި ލަނޑު ކާމިޔާބުކުރީ ޑެނިއަލް މުނޯޒް އެވެ.
މި މެޗުގައި ލިވަޕޫލަށް ކުރިމަތިވި އެންމެ ބޮޑު ހިތްދަތިކަމަކީ އެ ޓީމުގެ ތަރި މުހައްމަދު ސަލާހަށް އަނިޔާވެގެން ބާލަން ޖެހުމެވެ. މަސްގަނޑަށް ލިބުނު މި އަނިޔާއާ ގުޅިގެން ސަލާހް ދަނޑުން ފޭބީ ސަޕޯޓަރުންނަށް ވަރަށް ބޮޑަށް ޝުކުރު އަދާކުރުމަށްފަހު އެވެ.
މި މޮޅާއެކު ލިވަޕޫލް ވަނީ ތާވަލުގެ ހަތަރުވަނައަށް ޖެހިލާފަ އެވެ. އެއީ ގޯލުގެ ތަފާތުން އެސްޓަން ވިލާގެ މައްޗަށް ކުރި ހޯދައިގެންނެވެ. އާނޭ ސްލޮޓްގެ އިރުޝާދުގެ ދަށުން ކުޅެމުން އަންނަ ލިވަޕޫލަށް މި މޮޅާއެކު އަންނަ ސީޒަނުގެ ޗެމްޕިއަންސް ލީގުން ޖާގައެއް ހޯދުމުގެ އުންމީދު ވަނީ ވަރަށް ބޮޑަށް އާވެފަ އެވެ.
