މާލޭގެ ދަނާލެއްގައި މި މަހުގެ 20 ވަނަ ދުވަހުގެ ރޭ 18 އަހަރުގެ އަންހެން ކުއްޖަކު އަމިއްލައަށް މަރުވި ހާދިސާ ހިނގުމުގެ ކުރިން، ފުލުހުން އެ ކުއްޖާއާ މުއާމަލާތްކޮށް، ކަންކަން ބަލަމުންދިޔަ ގޮތުގެ ތަފްސީލީ ޓައިމްލައިނެއް ހޯމް މިނިސްޓަރު އަލީ އިހުސާން މިއަދު ހާމަކުރައްވައިފި އެވެ.

މިއަދު ހެނދުނު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ، އެ ހާދިސާ ހިނގި ރޭގެ 20:40 ހާއިރު ފުލުހުންގެ ވިކްޓިމް ސަޕޯޓުގެ ވައިބާ ނަންބަރަށް އެ ކުއްޖާ މެސެޖެއް ކުރި ކަމަށެވެ. އެ މެސެޖުގައި "އައި އޭމް ސޯ ކްލޯސް ޓު ގިވް އަޕް" އޭ ބުނެފައިވާއިރު، އޭގެ 9 މިނެޓު ފަހުން 20:49 ގައި ފުލުހުން ވަނީ "ހައި، ވުޑް ޔޫ ލައިކް ޓު ޝެއާ އެނީތިން ވިތު އަސް" ޖަހައި ޖަވާބު ދީފަ އެވެ.

މިނިސްޓަރު ހާމަކުރެއްވި ޓައިމްލައިންގައިވާ ގޮތުން، އެ ކުއްޖާ 20:50 ގައި "އައި ޖަސްޓް ކާންޓް ކޮންޓްރޯލް މައި ތޯޓްސް" އޭ ބުނުމަށްފަހު، 20:53 ގައި އެއްވެސް މީހަކަށް ނުގުޅުމަށާއި، އޭނާ ރަނގަޅުވާނެ ކަމަށް ބުނެ މެސެޖުކޮށްފައިވެ އެވެ. އަދި 20:56 ގައި ބޭރަށް ހިނގާލަން ދަނީ ކަމަށްވެސް އެ ކުއްޖާ ބުނެފައިވެ އެވެ.

އޭގެ ފަހުން އެއްވެސް މުއާމަލާތެއް ނުހިނގާ އޮތުމަށްފަހު، ދެން މެސެޖެއް ލިބުނީ ދަމުގެ ވަގުތެއްގަ އެވެ. "އެރޭ 00:38 ގައި 'އައި އޭމް ގޯން' ޖަހާފައި މެސެޖެއް ލިބުނު. އޭގެ ހަތަރު މިނެޓު ފަހުން 00:42 ގައި ފުލުހުން ވަނީ ހޮސްޕިޓަލަށް ދާން ބޭނުންތޯ ނުވަތަ ވާހަކަދައްކަން ބޭނުންތޯ އަހައި ރިޕްލައި ދީފައި،" މިނިސްޓަރު ވިދާޅުވި އެވެ. ނަމަވެސް އެ މެސެޖަށްފަހު އެ ކުއްޖާގެ އެއްވެސް ރެސްޕޮންސެއް ނުލިބޭ ކަމަށާއި، 00:57 ހާއިރު އެ ކުއްޖާ ވައިބާއިން އޮފްލައިންވެފައިވާ ކަމަށް އިހުސާން ވިދާޅުވި އެވެ.

ސޯޝަލް މީޑިއާގައި ދެކެވޭ ވާހަކަތަކަށް ރައްދު ދެއްވަމުން މިނިސްޓަރު ވިދާޅުވީ، އެ ކުއްޖާ އެކި ފަހަރު މަތިން ފުލުހުންގެ އެކި ނަންބަރުތަކަށާއި 911 އަށް ގުޅަން މަސައްކަތް ކުރި ކަމަށް ދެކެވޭ ވާހަކައަކީ ކަނޑައެޅިގެން ދޮގެއް ކަމަށެވެ. ފުލުހުންގެ ނުވަތަ ސަރުކާރުގެ އެއްވެސް އެފަދަ ނަންބަރަކަށް އެ ކުއްޖާ ގުޅާފައި ނުވާކަން މިނިސްޓަރު ކަށަވަރުކޮށްދެއްވި އެވެ.

މި ހާދިސާގެ ފަހުގެ ތަފްސީލުތައް ހިއްސާކުރައްވަމުން މިނިސްޓަރު ވިދާޅުވީ، ފުލުހުންގެ ވިކްޓިމް ސަޕޯޓުން 01:03 ގައި ކޮމާންޑް ސެންޓަރަށް ގުޅައި، ސީންއަށް ފުލުހުން ފޮނުވުމަށް އެދުނު ކަމަށެވެ. އަދި 01:08 ހާއިރު ފުލުހުން ދަނާލަށް ވަދެ، އިދާރީ މުވައްޒަފުންނާ ގުޅިގެން ކުއްޖާ އުޅޭ ކޮޓަރި ހޯދުމުގެ މަސައްކަތް ފެށި އެވެ. 01:32 ގައި ކޮޓަރި ކަށަވަރުވެގެން ބެލިއިރު، ކޮޓަރީގެ ބޮކިތައް ހުރީ ނިއްވާލާފަ އެވެ. ފެންލައިޓުން ބެލިއިރު ކުއްޖާ ދަންޖެހިފައި ހުއްޓާ ފެނުމުން، ފުލުހުން ވަނީ ފެންލައިޓުން ކޮޓަރި ތެރެއަށް ވަދެ، ކުރަންޖެހޭ މަސައްކަތްތައް ކޮށްފަ އެވެ.

މިނިސްޓަރު އިހުސާން ވަނީ ނަފްސާނީ މިފަދަ ނާޒުކު މައްސަލަތަކުގައި ހަގީގަތާ ހިލާފު ވާހަކަތައް ނުފެތުރުމަށް އިލްތިމާސްކުރައްވާފަ އެވެ. އެފަދަ ވާހަކަތަކުގެ ސަބަބުން މިހާރުވެސް މިފަދަ ކަންކަން ތަހައްމަލު ކުރަމުންދާ ފަރާތްތަކަށާއި އާއިލާތަކަށް ބޮޑެތި ހިތާމަތަކެއް ލިބޭނެކަން އެމަނިކުފާނު ފާހަގަކުރެއްވި އެވެ.

މި މައްސަލައިގައި ފުލުހުންގެ އެތެރޭގެ ތަހުގީގެއް ހިންގުމުގެ އިތުރުން، މިނިވަން މުއައްސަސާތަކުންވެސް ބަލަންޖެހޭ ކަންކަން ބަލަމުންދާނެ ކަމުގެ ޔަގީންކަން މިނިސްޓަރު ދެއްވި އެވެ.