ތ. ވޭމަންޑޫގެ ބިން ހިއްކުމުގެ ބޮޑު މަޝްރޫއުގެ ދަށުން ވެލި އެޅުމުގެ މަސައްކަތް ކާމިޔާބުކަމާއެކު ނިންމާލައިފިއެވެ.

މި މަޝްރޫއަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްގެން ކުރިއަށްގެންދިޔަ މަސައްކަތެކެވެ.

ވޭމަންޑޫގެ ބިން ހިއްކުމުގެ އަމަލީ މަސައްކަތް ފެށީ މާޗް މަހުގެ 12 ވަނަ ދުވަހުއެވެ. މި މަސައްކަތް އެއްކޮށް ނިންމާލާފައިވަނީ އެންމެ 23 ދުވަސް ތެރޭގައެވެ. ބިން ހިއްކުމަށް ވެލި އެޅުމުގެ މަސައްކަތް އެއްކޮށް ނިންމާލާފައިވަނީ މި މަހުގެ 4 ވަނަ ދުވަހުއެވެ.

މި މަޝްރޫއުގެ ދަށުން ވޭމަންޑޫއަށް ޖުމްލަ 27 ހެކްޓަރުގެ ބިން ވަނީ އިތުރުކޮށްފައެވެ. މި ބިން ހިއްކުމަށްޓަކައި 882,693 ކިއުބިކް މީޓަރުގެ ވެލި ވަނީ ބޭނުންކޮށްފައެވެ. ބިން ހިއްކުމުގެ މަސައްކަތް ނިމުމާއެކު، ދެން ކުރިއަށްދާނީ ހިއްކި ބިން ހިމާޔަތްކުރުމަށްޓަކައި ބޮޑުހިލައިގެ ރިވެޓްމަންޓް ޖެހުމުގެ މަސައްކަތްތަކެވެ.

ވޭމަންޑޫގެ ބިން ހިއްކުމުގެ މަސައްކަތަކީ ރައީސް މުޢިއްޒު އެ ރަށަށް ކުރެއްވި ދަތުރުފުޅެއްގައި ރައްޔިތުންނަށް ވެވަޑައިގެންނެވި ވައުދެކެވެ. 1,300 އަށްވުރެ ބޮޑު އާބާދީއެއް އޮންނަ ވޭމަންޑޫއަށް ދިމާވެފައިވާ ބޯހިޔާވަހިކަމުގެ މައްސަލައަށް މި މަޝްރޫއުގެ ސަބަބުން ދާއިމީ ހައްލެއް ލިބި، އިގުތިސާދީ ގޮތުން އިތުރު ފުރުސަތުތައް ފަހިވެގެންދާނެއެވެ.

ބިން ހިއްކުމުގެ އިތުރުން ވޭމަންޑޫގެ ތަރައްގީއަށް ގިނަ މަޝްރޫއުތަކެއް ސަރުކާރުން ވަނީ ރާވާފައެވެ. އޭގެ ތެރޭގައި ވޭމަންޑޫއާއި ކިނބިދޫ ކޯޒްވޭއަކުން ގުޅާލުމާއި، އެ ދެމެދުގައި އޮންނަ "އެލާ" ފަޅުރަށް ފަތުރުވެރިކަމަށް ތަރައްގީކުރުން ހިމެނެއެވެ. އަދި 50 އެނދުގެ ހޮސްޕިޓަލަކާއި، 500 މީހުންގެ ޖާގައިގެ މިސްކިތެއްގެ އިތުރުން 1,200 މީހުންގެ ކެޕޭސިޓީގެ ސްޕޯޓްސް ކޮމްޕްލެކްސްއެއް ބިނާކުރުންވެސް ހިމެނެއެވެ.