ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، ބޭންކް އޮފް މޯލްޑިވްސްގެ ސަބްސިޑަރީ ކުންފުނި ކަމުގައިވާ ބީ.އެމް.އެލް އެފޯޑަބަލް ލީޒިންގ ޕްރައިވެޓް ލިމިޓެޑާ ހަވާލުކޮށްގެން ހުޅުމާލެ ފޭސް 1ގައި ތަރައްގީކުރާ 182 ހައުސިން ޔުނިޓުގެ ބިންގާ އެޅުމާއި އަމަލީ މަސައްކަތް ފެށުމުގެ ރަސްމިއްޔާތު، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޝަރަފުވެރިކޮށްދެއްވައިފި އެވެ.
ހުޅުމާލެ ފޭސް 1ގައި ބޭއްވި މި ރަސްމިއްޔާތުގައި، 182 ހައުސިން ޔުނިޓުގެ ބިންގާ އަޅުއްވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ ޑރ. އަބްދުالله މުއްތަލިބާއި، ބީ.އެމް.އެލް އަދި މި މަޝްރޫއު ހިންގުމާ ހަވާލުވެފައިވާ އެފް.ޑަބްލިއު ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑްގެ އިސްވެރިންނެވެ.
މި މަޝްރޫއުގެ ދަށުން ތަރައްގީކުރެވެނީ ބޮޑުމިނުގައި 900 އަކަފޫޓު ހިމެނޭ 3 ކޮޓަރީގެ އެޕާޓްމަންޓްތަކެކެވެ. "ބީއެމްއެލް އެފޯޑަބަލް ހޯމް ލީސިން" ސްކީމް މެދުވެރިކޮށް ހިންގާ މި "އެފޯޑަބަލް ހައުސިން" މަޝްރޫއަކީ "ލީސް-ޓު-އޯން" ނުވަތަ ކުއްޔަށް ހިފުމަށްފަހު ފްލެޓް މިލްކުކުރެވޭ ގޮތަށް ފަހިކޮށްދެވިފައިވާ ފުރުސަތެކެވެ. މި ސްކީމްގެ ދަށުން ހުޅުމާލެ ފޭސް 1، ހުޅުމާލެ ފޭސް 2، އަދި ވިލިމާލޭގައި ޖުމްލަ 3260 ހައުސިން ޔުނިޓް ތަރައްގީކުރުމަށް ހަމަޖެހިފައިވާއިރު، މުޅި މަޝްރޫއުގެ އަމަލީ މަސައްކަތް ނިންމުމަށް ހަމަޖެހިފައިވަނީ 2028 ވަނަ އަހަރުގެ އޮގަސްޓު މަހުގެ ނިޔަލަށެވެ.
މި ސްކީމްގެ ދަށުން، މިހިނގާ މާޗު މަހުގެ ތެރޭގައި ތިން މަޝްރޫއެއްގެ ބިންގާ އެޅި އަމަލީ މަސައްކަތް ވަނީ ފަށާފައެވެ. ހުޅުމާލެ ފޭސް 1ގެ 182 ޔުނިޓުގެ މި މަޝްރޫޢުގެ އިތުރުން، ޗައިނާ މެޝިނަރީ އިންޖިނޭރިން ކޯޕަރޭޝަން (ސީ.އެމް.އީ.ސީ)އިން ހުޅުމާލެ ފޭސް 2ގައި ތަރައްގީކުރާ 1224 ހައުސިން ޔުނިޓާއި، ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރް.ސީ.ސީ)އާ ހަވާލުކޮށްގެން ވިލިމާލޭގައި ތަރައްޤީކުރާ 300 ހައުސިން ޔުނިޓުގެ މަޝްރޫއު ހިމެނެ އެވެ.
މިއަހަރުގެ ރިޔާސީ ބަޔާން އިއްވަވަމުން ރައީސް ވިދާޅުވީ، އިޖުތިމާޢީ ތަރައްގީ އާއި ރައްކާތެރިކަން ކަށަވަރުކުރެވޭނީ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނެސްދެވިގެން ކަމުގަ އެވެ. ސަރުކާރުގެ ބޯހިޔާވަހިކަމުގެ ސިޔާސަތު ބައްޓަން ކުރެވިފައިވަނީ ކޮންމެ ދިވެހި ރައްޔިތަކަށްވެސް ބޯހިޔާވަހިކަމުގެ ފުރުސަތު ތަނަވަސްކޮށްދިނުމާއެކު، ކޮންމެ މީހަކަށްވެސް އިޖްތިމާއީ ރައްކާތެރިކަން ފޯރުކޮށްދިނުމަށް ކަމަށް ރައީސް ވިދާޅުވިއެވެ. މި ދައުރުގެ ތެރޭގައި ރާއްޖޭގެ ކޮންމެ އާއިލާއަކަށް ބޯހިޔާވަހިކަން ކަށަވަރު ކޮށްދެއްވުމަކީ އެމަނިކުފާނުގެ ވައުދެކެވެ.
