ކ.ހިންމަފުށިގައި ސަރުކާރުން ތަރައްގީކުރުމަށް ހަމަޖެހިފައިވާ ސިއްހީ މަރުކަޒުގެ މަސައްކަތް ރަސްމީކޮށް ވަނީ އެމްޓީސީސީއާ ހަވާލުކޮށްފި އެވެ.
ކ.ހިންމަފުށީގައި ސިއްހީ މަރުކަޒު ތަރައްގީކުރުމުގެ މަސައްކަތުގެ އެއްބަސްވުމުގައި ސޮއިކުރީ މިއަދު ހެލްތު މިނިސްޓްރީގައި ބޭއްވި ރަސްމިއްޔާތެއްގަ އެވެ. އެގޮތުން އެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއީލް ޝަރީފު އެވެ. އަދި އެމްޓީސީސީގެ ފަރާތުން ސޮއިކުރެއްވ،ީ އެ ކުންފުނީގެ ޑެޕިޔުޓީ މެނޭޖިން ޑިރެކްޓަރު، އަހްމަދު ޝަރީފު އަބްދުލް ރަހްމާން ޔޫސުފު އެވެ.
އެމްޓީސީސީއިން ބުނީ ހިންމަފުށީ ސިއްހީ މަރުކަޒު ތަރައްގީ ކުރުމުގެ މަޝްރޫއުގެ ދަށުން އަލަށް އިތުރު ކުރާ އިމާރަތް ހަދާނީ 5767 އަކަފޫޓުގެ ސަރަހައްދެއްގައި ކަމަށެވެ. އަދި އެމްޓީސީސީން ހިންމަފުށީގައި ކުރިއަށް ގެންދިއުމަށް ހަމަޖެހިފައިވާ އެ މަޝްރޫއަކީ 11.24 މިލިއަން ރުފިޔާއަށް 360 ދުވަސްތެރޭގައި އެ ކުންފުނިން ނިންމަންޖެހޭ މަޝްރޫއެކެވެ.
ހިންމަފުއްޓަކީ ގާތްގަނޑަކަށް 1310 މީހުންގެ އާބާދީއެއް އޮންނަ ރަށެކެވެ. އެގޮތުން ރައްޔިތުންނަށްޓަކައި ސަރުކާރުން ރާވާފައިވާ މަޝްރޫއުގެ މަސައްކަތް ފުރިހަމަވުމުން އެ ރަށުގެ ސިއްހީ ހިދުމަތުގެ ފެންވަރު ރަނގަޅުވާނެ ކަމަށް އެމްޓީސީސީ ވަނީ ބުނެފަ އެވެ.
އޭގެ އިތުރުން އެމްޓީސީސީއިން ބުނީ ވޭތުވެދިޔަ 45 އަހަރުތެރޭ އެ ކުންފުނިން ވާނީ ރާއްޖޭގެ އެކި ކަންކޮޅުތަކުގައި އުމްރާނީ ތަރައްގީގެ ގިނަ މަޝްރޫއުތަކެއްނިންމައިފަ ކަމަށެވެ. އެގޮތުން އެ ކުންފުނިން ކާމިޔާބުކަމާއެކު ނިންމާ މަޝްރުއޫތަކުގެ ސަބަބުން މުޅި ރަށުގެ އާބާދީއަށް ފާހަގަކުރެވޭ ފައިދާތަކެއް ކުރާ ކަމަށް އެމްޓީސީސީން ވަނީ ފާހަނގަކޮށްފަ އެވެ.
ކ.ހިންމަފުށީގައި ތަރައްގީކުރާ ސިއްހީ މަރުކަޒުގެ މަސައްކަތް ނިމުމުން އެ ރަށުގެ ރައްޔިތުން ދަތުރު ފަތުރުކުރުމަށް ޓަކައި އުފުލަންޖެހޭ ތަކުލީފާއި ހަރަދު ކުޑަވާނެ އެވެ.
