އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުތަކަށް ފަހު، ތާވަލުގެ ކުރީގައި އުޅޭ ޓީމުތަކަށް ނުކުތީ ހީނުކުރާ ފަދަ ނަތީޖާތަކެކެވެ. އެގޮތުން ލިވަޕޫލާއި ޗެލްސީ ބަލިވިއިރު، މެންޗެސްޓާ ޔުނައިޓެޑަށް ޖެހުނީ އެއްވަރުވެގެން ފަރުޖައްސާލާށެވެ.

ބޯންމައުތާއި މެންޗެސްޓާ ޔުނައިޓެޑް ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ. މި މެޗުގެ 61 ވަނަ މިނެޓުގައި ލިބުނު ޕެނަލްޓީއަކުން ބްރޫނޯ ފެނާންޑެސް ޔުނައިޓެޑަށް ލީޑު ނަގައިދިން ނަމަވެސް، 67 ވަނަ މިނެޓުގައި ރަޔަން ކްރިސްޓީ ވަނީ ބޯންމައުތަށް ނަތީޖާ އެއްވަރުކޮށްދީފައެވެ. ޔުނައިޓެޑަށް ދެވަނަ ގޯލަކީ 71 ވަނަ މިނެޓުގައި ބޯންމައުތުގެ ޖޭމްސް ހިލްސް އަތުން ބައިކޮޅަށް ވަތް ގޯލެކެވެ. ނަމަވެސް މެޗުގެ 78 ވަނަ މިނެޓުގައި ޔުނައިޓެޑުގެ ޑިފެންޑަރު ހެރީ މަގުއިރޭއަށް ރަތްކާޑު ދައްކާ ދަނޑުން ފޮނުވާލުމާ އެކު، ޔުނައިޓެޑަށް މެޗުގެ ކޮންޓްރޯލް ގެއްލުނެވެ. އޭގެ ނަތީޖާއެއްގެ ގޮތުން 81 ވަނަ މިނެޓުގައި ލިބުނު ޕެނަލްޓީއަކުން ޖޫނިއާ ކްރޫޕީ ވަނީ ބޯންމައުތަށް މެޗުގެ ނަތީޖާ އަލުން އެއްވަރުކޮށްދީފަ އެވެ.

ލިވަޕޫލް ކުޅުނު މެޗުން ބްރައިޓަން އަތުން ބަލިވީ 2-1 ގެ ނަތީޖާއަކުންނެވެ. ބްރައިޓަންގެ ދެ ގޯލުވެސް، މެޗުގެ 14 ވަނަ މިނެޓާއި 56 ވަނަ މިނެޓުގައި ކާމިޔާބުކޮށްދިނީ ތަޖުރިބާކާރު ފޯވާޑް ޑެނީ ވެލްބެކެވެ. ލިވަޕޫލްގެ ހަމައެކަނި ގޯލު 30 ވަނަ މިނެޓުގައި ޖަހައިދިނީ މިލޮސް ކާކެޒް އެވެ.

ޗެލްސީއަށް ކުރިމަތިލާން ޖެހުނީ ވަރަށް ހިތްދަތި ނަތީޖާއެކެވެ. އެވަޓަން އަތުން އެޓީމު ބަލިވީ 3-0 އިންނެވެ. އެވަޓަންގެ ބެޓޯ ވަނީ 33 ވަނަ މިނެޓާއި 62 ވަނަ މިނެޓުގައި ދެ ގޯލު ޖަހާފަ އެވެ. އެޓީމުގެ ތިންވަނަ ގޯލު 76 ވަނަ މިނެޓުގައި ކާމިޔާބުކުރީ ޑިއާޔޭ އެވެ.

މީގެ އިތުރުން ފުލަމް އާއި ބާންލޭ ބައްދަލުކުރި މެޗު 1-3 އިން ކާމިޔާބުކުރީ ފުލަމްއެވެ.

މި ނަތީޖާތަކާއެކު ގަދަ ހަތަރަކަށް އެރުމަށްޓަކައި ޗެލްސީ އަދި ލިވަޕޫލް ކުރަން ޖެހޭ މަސައްކަތްތައް މިވަނީ ވަރުގަދަކުުރަންޖެހިފަ އެވެ. ތާވަލުގެ ހަ ވަނައިގައި ޗެލްސީ 48 ޕޮއިންޓާއެކު އޮތްއިރު ލިވަޕޫލް ފަސް ވަނައިގައި އޮތީ 49 ޕޮއިންޓާއެކު އެވެ. މެންޗެސްޓާ ޔުނައިޓެޑް ތިން ވަނައިގައި އޮތީ 55 ޕޮއިންޓު ހޯދައިގެންނެވެ.