އިނގިރޭސި ޕްރިމިއާ ލީގުގައި މިރޭ ތާވަލުގެ އެންމެ ފުލުގައި އޮތް ވުލްވަހެމްޕްޓަން ވޮންޑަރާސް (ވުލްވްސް) އަތުން ލިވަޕޫލް 2-1 އިން ބަލިވެއްޖެ އެވެ.

ވުލްވްސްގެ މޮލިނިއުސް ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ދެ ޓީމަށްވެސް މާ ރަނގަޅު ފުރުސަތުތަކެއް ތަނަވަސްކުރެވިފައެއް ނުވެ އެވެ. މެޗުގެ ފުރަތަމަ ލަނޑު ޖަހައި ކުރިހޯދީ ވުލްވްސްއިންނެވެ. މެޗުގެ 78 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ރޮޑްރިގޯ ގޯމޭޒްއެވެ. މިއީ މުޅި މެޗުގައިވެސް ވުލްވްސްއިން ލިވަޕޫލްގެ ގޯލަށް ފޮނުވާލި ފުރަތަމަ ހަމަލާ އެވެ.

ނަމަވެސް އޭގެ ފަސް މިނެޓު ފަހުން، މުހައްމަދު ސަލާހު ވަނީ ލަނޑެއް ޖަހައި ލިވަޕޫލަށް ނަތީޖާ ހަމަހަމަކޮށްދީފަ އެވެ. މިއީ ނޮވެމްބަރު މަހުގެ ފަހުން ސަލާހު ލީގުގައި ޖެހި ފުރަތަމަ ލަނޑެވެ.

ލިވަޕޫލަށް މައްސަލަ ދިމާވީ މެޗުގެ އިތުރު ވަގުތުގެ ތެރޭގައެވެ. 94 ވަނަ މިނެޓުގައި ވުލްވްސްގެ ބްރެޒިލް މިޑްފީލްޑަރު އެންޑްރޭ ފޮނުވާލި ހަމަލާއެއް ލިވަޕޫލްގެ ޖޯ ގޯމޭޒްގެ ގައިގައި ޖެހިފައި މިސްރާބު ބަދަލުވެގެން ގޯލުގެ ތެރެއަށް ވަނުމުން ވުލްވްސްއަށް ތިން ޕޮއިންޓް ކަށަވަރުވި އެވެ.

މި ނަތީޖާއާއެކު ލިވަޕޫލް ވަނީ މި ސީޒަނުގައި މެޗުގެ 90 މިނެޓު ހަމަވިފަހުން ޖެހި ލަނޑުތަކުން ފަސް މެޗުން ބަލިވެފަ އެވެ. މިއީ ޕްރިމިއާ ލީގުގެ ތާރީހުގައިވެސް އެއް ސީޒަނެއްގައި އިތުރު ވަގުތުގެ ލަނޑުތަކުން ޓީމެއް މިހާ ގިނައިން ބަލިވި ފުރަތަމަ ފަހަރެވެ.

މެޗަށްފަހު ވާހަކަދައްކަމުން ލިވަޕޫލްގެ ކޯޗު އާން ސްލޮޓް ބުނީ، މިއީ އަނެއްކާވެސް "ބާ މާޒީ" އިއާދަވުން ކަމަށެވެ. ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، އޯޕަން ޕްލޭއިން ލަނޑު ޖަހަން އުނދަގޫވުމުގެ މައްސަލަ މި މެޗުގައިވެސް ފެނިގެންދިޔަ ކަމަށް އޭނާ ފާހަގަކުރި އެވެ.

މި ބައްޔާއެކު ލިވަޕޫލްގެ ސީޒަން އިތުރަށް ގޯސްވެފައިވާއިރު، ވުލްވްސްއިން ވަނީ ރެލިގޭޝަނުން ސަލާމަތްވުމަށް ކުރާ މަސައްކަތުގައި މުހިންމު މޮޅެއް ހޯދާފަ އެވެ. 20 ވަނައިގައި 16 ޕޮއިންޓާއެކު އެ ޓީމު އޮތް އިރު 19 ވަނައިގައި 19 ޕޮއިންޓާއެކު އޮތީ ބާންލޭ އެވެ. ބާންލޭ ވަނީ މިރޭ އެވަޓަން އަތުން 0-2 އިން ބަލިވެފަ އެވެ. ތާވަލުގެ 18 ވަނައިގައި 25 ޕޮއިންޓާއެކު އޮތީ ވެސްޓްހޭމް އެވެ.

ލިވަޕޫލް އޮތީ ތާވަލުގެ ފަސް ވަނައިގައި 48 ޕޮއިންޓާއެކު އެވެ. މިރޭ ކުޅޭ މެޗުތަކުގެ ނަތީޖާ ނިކުންނާނެ ގޮތަކުން ލިވަޕޫލް މިއަށްވުރެ ދަށަށް ވެއްޓުން އެކަށީގެންވެ އެވެ.