ދިވެހި ފިލްމު އިންޑަސްޓްރީގައި މަޝްހޫރުކަން ހޯދި ފަންނާނެއް ކަމަށްވާ މުހައްމަދު ނައީމް ނިޔާވެއްޖެ އެވެ.
ނައީމް ނިޔާވީ ރޭގެ ވަގުތެއްގަ އެވެ. އުމުރުން 71 އަހަރުގައި ނައީމް ނިޔާވީ ކޮން ސަބަބަކާ ހެދި ކަމެއް އަދި ކަށަވަރެއް ނުވެ އެވެ.
ނައީމަކީ ދިވެހި ފިލްމް އިންޑަސްޓްރީގައި ރުޅިގަދަ އަދި ސީރިއަސް ބައްޕައެއްގެ ރޯލްތަކެއް ކުޅެފައިވާ ފަންނާނެކެވެ. މީގެ އިތުރުން އެޓޯލްސް މިނިސްޓްރީގެ ބައެއް ޑްރާމާތަކުގައްޔާއި، ޓީވީއެމުން ގެނެސްދިން ބައެއް ޑްރާމާތައް ވެސް އޭނާ ކުޅެފައިވެ އެވެ. އޭނާ މަޝްހޫރުވި ފިލްމުތަކުގެ ތެރޭގައި ފިލްމް "ޒުލޭހާ" ހިމެނެ އެވެ.
މީގެ އިތުރުން ދިވެހި ބައެއް ލަވަތަކުން ވެސް ނައީމް ފެނެ އެވެ. އޭނާ ކުޅެފައިވާ ފިލްމުތަކާއި ޑްރާމާތަކެކޭ އެއްގޮތަށް އެ ލަވަތަކުން ވެސް އޭނާ ފެނިގެންދަނީ ވަރަށް ރުޅިގަދަ އަދި ސީރިއަސް މީހެއްގެ ގޮތުގަ އެވެ. މީގެ ތެރެއިން އެންމެ ފާހަގަކޮށްލެވޭ އެއް ލަވައަކީ "ގޮވިއްޖެ ނަދުރު" ލަވަ އެވެ.
ނައީމްގެ ޖަނާޒާ ބާއްވާނީ މިއަދުގެ މެންދުރު ނަމާދަށް ފަހު އާސަހަރާ މިސްކިތުގަ އެވެެ.
