މިއަހަރު ނިމޭއިރު ދިވެހިރާއްޖޭގެ ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) ނުވަތަ ގައުމީ އުފެއްދުންތެރިކަން 111.4 ބިލިއަން ރުފިޔާއަށް އުފުލޭނެ ކަމަށް މަރުކަޒީ ބޭންކް، އެމްއެމްއޭ އިން އަންދާޒާކޮށްފި އެވެ. އެމްއެމްއޭ އިން ބުނިގޮތުގައި، މިއީ ރާއްޖޭގެ މާލީ ހާލަތު އިތުރަށް ހަރުދަނާ ކުރުމަށްޓަކައި ސަރުކާރާއި އެ ބޭންކުން ގުޅިގެން އަޅަމުންދާ ފިޔަވަޅުތަކުގެ ސަބަބުން ލިބިގެންދާނެ ކުރިއެރުމެކެވެ.

ޖީޑީޕީ ނުވަތަ ގައުމީ އުފެއްދުންތެރިކަމުގެ މިންގަނޑަކީ ގައުމެއްގެ ސަރަހައްދުގެ ތެރޭގައި އުފައްދާ މުދަލާއި ފޯރުކޮށްދޭ ހިދުމަތްތަކުގެ ޖުމްލަ އަގަށް ކިޔާ ނަމެކެވެ. މީގެ ތެރޭގައި ބާޒާރުގައި ވިއްކާ ތަކެތީގެ އިތުރުން، ސަރުކާރުން ހިލޭ ފޯރުކޮށްދޭ ތައުލީމީ އަދި ދިފާއީ ހިދުމަތްތައް ފަދަ މުހިންމު ކަންކަންވެސް ހިމެނެ އެވެ.

އެމްއެމްއޭ އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާ ގޮތުން މިދިޔަ އަހަރު ރާއްޖޭގެ ޖީޑީޕީ ހުރީ 105.8 ބިލިއަން ރުފިޔާގަ އެވެ. 2024 ވަނަ އަހަރު ޖީޑީޕީ ހުރީ 100.4 ބިލިއަން ރުފިޔާގަ އެވެ.

މިދިޔަ އަހަރުގެ ބޮޑު ކުރިއެރުމަށްފަހު، މިއަހަރުވެސް އިގުތިސާދު ބޮޑުތަނުން ކުރިއަރާނެ ކަމަށް އެމްއެމްއޭ އިން ވަނީ ލަފާކޮށްފަ އެވެ. އެގޮތުން މި އަހަރު ރާއްޖޭގެ އިގުތިސާދު 4.8 އާއި 5.3 އިންސައްތައާ ދެމެދުގެ މިންވަރަކަށް ކުރިއަރައި، ރިއަލް ޖީޑީޕީ 111.4 ބިލިއަން ރުފިޔާއަށް އަރާނެ ކަމަށް އެބޭންކުން ލަފާކުރެ އެވެ.

ތަފާސްހިސާބުތަކުން ދައްކާގޮތުން ތަކެތީގެ އަގަށް އަންނަ ބަދަލުތައް ހިމަނައިގެން ބަލާ ނޮމިނަލް ޖީޑީޕީވެސް މިއަހަރު އިތުރުވާނެ އެވެ. މިދިޔަ އަހަރު 116.3 ބިލިއަން ރުފިޔާގައި ހުރި ނޮމިނަލް ޖީޑީޕީ، މިއަހަރު ނިމޭއިރު 124.4 ބިލިއަން ރުފިޔާއަށް އުފުލޭނެ ކަމަށް ލަފާކޮށްފަ އެވެ.

އެމްއެމްއޭއިން ފާހަގަކުރި ގޮތުގައި މި ކުރިއެރުން ބިނާވެފައިވަނީ ފަތުރުވެރިކަމާއި، ދަތުރުފަތުރާއި، މުވާސަލާތީ ހިދުމަތްތަކުގެ އިތުރުން ވިޔަފާރީގެ ދާއިރާއަށް އަންނާނެ ކުރިއެރުންތަކުގެ މައްޗަށެވެ. ވަކިން ހާއްސަކޮށް، މިއަހަރުގެ ތެރޭގައި 2.4 މިލިއަން ފަތުރުވެރިން ރާއްޖެއަށް އަންނާނެ ކަމަށް ބެލެވުމަކީ ގައުމީ އުފެއްދުންތެރިކަން އިތުރުވުމަށް ލިބޭނެ ބޮޑު ބާރެެއް ކަމަށް އެމްއެމްއޭ އިން ބުންޏެވެ.