ސައޫދީ އަރަބިއްޔާ އާއި ގަތަރު ހައި-ސްޕީޑް ރެއިލް ލިންކެއް ގާއިމްކުރުމުގެ އެއްބަސްވުމެއްގައި އިއްޔެ ސޮއިކޮށްފައެވެ. މިއީ ދެ ގަލްފު ގައުމު ދެމެދު ގާއިމްކުރެވޭ މިފަދަ ފުރަތަމަ މަޝްރޫއެވެ.
މިކަން އިއުލާނު ކުރައްވާފައިވަނީ ސައޫދީ-ގަތަރު ކޯޑިނޭޝަން ކައުންސިލްގެ އޮނިގަނޑުގެ ތެރެއިން، ރިޔާޟްގައި ބޭއްވުނު ބައްދަލުވުމެއްގައި ސައޫދީގެ ވަލީއަހުދު މުހައްމަދު ބިން ސަލްމާން އާއި ގަތަރުގެ އަމީރު ޝައިހް ތަމީމް ބިން ހަމަދު އާލް-ޘާނީ ދެ ބޭފުޅުން ބައްދަލުކުރެއްވުމަށް ފަހުގައެވެ.
މި އާ ރޫޓުން ރިޔާޟްގެ ކިންގް ސަލްމާން ބައިނަލްއަގްވާމީ ވައިގެ ބަނދަރާއި ދޯހާގެ ހަމަދު ބައިނަލްއަގްވާމީ ވައިގެ ބަނދަރު ގުޅުވާލާނެއެވެ. އެހެންކަމުން ދެ ވެރިރަށް ދެމެދު ދަތުރުކުރުމަށް ހޭދަވާ ވަގުތު އެންމެ ދެ ގަޑިއިރަށް ކުޑަވާނެއެވެ.
ބައްދަލުވުމަށް ފަހު ނެރުނު ބަޔާނުގައިވާ ގޮތުން، މި ރެއިލް މަޝްރޫއު ހަ އަހަރު ތެރޭގައި ނިމޭނެ ކަމަށް ވަނީ ލަފާކޮށްފައެވެ. އަދި މި މަޝްރޫއު ފެށުމުން ދެ ގައުމުގައި 30،000 ވަޒީފާ އުފެދި، އަހަރަކު 10 މިލިއަނަށް ވުރެ ގިނަ ފަސިންޖަރުންނަށް ހިދުމަތް ދެވޭނެ ކަމަށްވެސް ވަނީ ލަފާކޮށްފައެވެ. މި ރެއިލްވޭ ގައި 785 ކިލޯމީޓަރު ހުންނާނެ އެވެ. އެހެންކަމުން ގަޑިއިރަކު 300 ކިލޯމީޓަރު ބާރު މިނުގައި މި ރޭލު ދަތުރުކުރާނެ އެވެ.
ސައޫދީ ޕްރެސް އެޖެންސީއިން ރިޕޯޓުކޮށްފައިވާ ގޮތުގައި، މި ދެ ބޭފުޅުން ބައްދަލުކުރެއްވީ ރިޔާޟްގައި ހުންނަ އަލް-ޔަމާމާ ގަނޑުވަރުގައެވެ. އަދި ގަތަރު-ސައޫދީ ކޯޑިނޭޝަން ކައުންސިލްގެ އަށްވަނަ ޖަލްސާގެ ރިޔާސަތު ބެލެހެއްޓެވީވެސް ދެ ބޭފުޅުންނެވެ.
ޝައިހް ތަމީމްއާ އެކު މި ބައްދަލުވުމުގައި ބައިވެރިވެވަޑައިގަތީ، ބޮޑުވަޒީރާއި ފޮރިން މިނިސްޓަރު ޝައިހް މުހައްމަދު ބިން އަބްދުއްރަހްމާން ބިން ޖާސިމް އާލް-ޘާނީއާއި، އިސް އޮފިޝަލުންގެ ވަފުދެކެވެ.
