ދުނިޔޭގެ ބައެއް ހިސާބުތަކަށް ބާރުގަދަ ބިންހެލުންތަކެއް އައިސް މަދުވެގެން ފަސްޤައުމަކަށް އަސަރުކޮށް، އެތައް މިލިއަން ބަޔަކަށް ބިރުވެރިކަން ކުރިމަތުވެއްޖެއެވެ.

މިއަދު ދުނިޔެއަށް އައި އެންމެ ބާރުގަދަ ބިންހެލުމަކީ ޖަޕާނުގެ އުތުރުގެ މިސާވާގެ އައްސޭރި އަށް އައި 7.6 މެގްނިޓިއުޑްގެ ބިންހެލުމެވެ. މި ބިންހެލުމާއި ގުޅިގެން ޖަޕާނުގެ އުތުރުގެ ބަނދަރަކަށް ސުނާމީގެ ރާޅު އަރާފައިވާއިރު ގާތްގަނޑަކަށް 90،000 މީހުން ރައްކާތެރި ހިސާބުތަކަށް ވަނީ ބަދަލު ކޮށްފައެވެ.

ޖަޕާނަށް އެރި ފުރަތަމަ ރާޅުތައް 40–70 ސެންޓިމީޓަރުގެ އުސްމިނުގައި ހުރި އިރު، 3 މީޓަރާއި ހަމަޔަށް ރާޅު އަރާފާނެ ކަމުގެ އިންޒާރު ވަނީ ދީފައެވެ. ޖަޕާނުން މަދުވެގެން ހަތް މީހަކަށް އަނިޔާވެ، ކަރަންޓް ކެނޑިފައި ވާއިރު، މުޅި އެ ސަރަޙައްދަށް އަފްޓާޝޮކްތައް އަންނާތީވެ ދަތުރުފަތުރުގެ ޚިދުމަތްތަކަށް ބުރޫއަރާފައިވާ ކަމަށް ޚަބަރުތައް ބުނެއެވެ.

ދެން މިއަދު އެންމެ ބޮޑު ބިންހެލުމަކާއި ކުރިމަތިލީ އެމެރިކާގެ މީހުންނެވެ. 5.8 މެގްނިޓިއުޑްގެ މި ބިންހެލުން އައީ އަލަސްކާގެ ސަރަޙައްދަކަށެވެ. ނަމަވެސް މާބޮޑު ގެއްލުމެއް މިހާތަނަށް ރިޕޯޓު ކޮށްފައި ނުވާއިރު، ސުނާމީގެ ނުރައްކަލެއް ނެތް ކަމަށް އެމެރިކާ އިން ބުނެއެވެ.

ޓައިވާނަށް ވެސް 5.3 މެގްނިޓިއުޑްގެ ބިންހެލުމެއް އައެވެ. ނަމަވެސް މީހަކަށް ގެއްލުމެއް ނުވާއިރު، ރަޝިޔާއަށް 5.2 މެގްނިޓިއުޑްގެ ބިންހެލުމެއް އަދި ތުރުކީވިލާތުގެ ފަތުރުވެެރިންގެ މަޤްބޫލް އަންތާލިއާ އަށް 5.1 މެގްނިޓިއުޑްގެ ބިންހެލުންތަކެއް ރެކޯޑް ކުރެވިފައި ވެއެވެ.