ހޮނިހިރު ދުވަހުގެ ހަވީރު ދިރާގު ދިވެހި ޕްރިމިއާ ކީގުގެ މެޗެއް ކުޅެމުން ދަނިކޮށް ފިޓް ޖެހިގެން ދަނޑު މައްޗަށް ވެއްޓުނު ގައުމީ ޓީމުގެ ކުރީގެ ތަޖުރިބާ ކާރު ޑިފެންޑަރު މުހައްމަދު ރަޝީދު (ހޮކޭ)ގެ ހާލު ރަނގަޅުވެ ހޮސްޕިޓަލުން ދޫކޮށްލައިފި އެވެ.
ފިޓް ޖެހުމާއެކު ހޮކޭ ވަނީ ވަގުތުން އޭޑީކޭ ހޮސްޕިޓަލަށް ގެންގޮސްފަ އެވެ. މައުލޫމާތު ލިބިފައިވާ ގޮތުގައި އިއްޔެ ތިން ފަހަރެއްގެ މަތިން އޭނާ ފިޓް ޖެހުނެވެ. ދަނޑު މަތީގައި އެއްފަހަރު ހޮސްޕިޓަލަށް ގެނައި މަގުމަތީގައި އެއްފަހަރު އަދި ހޮސްޕިޓަލަށް ގެނައި ފަހުން ވެސް ފިޓް ޖެހިފައިވެ އެވެ.
ހޮސްޕިޓަލާ ހަވާލާދީ ހޮކޭ ކުޅެމުން އަންނަ އޮޑި ސްޕޯޓްސްގެ އޮފިޝަލް އަލީ ޝިފާޒު ބުނީ އެމްއާރުއައި ހަދާފައިވާ ކަމަށާއި ނޯމަލް ކަމަށެވެ.
ޓީސީއާ ދެކޮޅަށް އިއްޔެ ކުޅުނު މެޗުގައި ހޮކޭ ފިޓް ޖެހުނީ 66 ވަނަ މިނެޓުގައި މަތިން އައި ބޯޅައެއް ބޮލުން ޖަހަން އުޅުމުގެ ތެރޭގައި ދަނޑުމައްޗަށް ވެއްޓިގެންނެވެ. ދަނޑުމަތީގައި ހޮކޭ އަށް ވަނީ ގިނަ އިރުތަކެއް ވަންދެން ފަރުވާ ދީފަ އެވެ.
މި މެޗު އޮޑިން ކާމިޔާބުކުރީ 0-3 ގެ ނަތީޖާއިންނެވެ. ގޯލުތައް ޖަހައިދިނީ ބޭރު ކުޅުންތެރިޔާ ކަރޮލިސް ލައުކްޒެމިސް އާއި މުޒްދާން ހަސަންގެ އިތުރުން އަހުޒަމް ރަޝީދެވެ. މި މޮޅާއެކު އެއްވަނައިގައި އޮތް މާޒިޔާ ސްޕޯޓްސްއާ ފަސް ޕޮއިންޓް ގާތަށް އޮޑި ވަނީ ޖެހިލާފަ އެވެ.
ހޮކޭ އަކީ އާންމު ގޮތެއްގައިވެސް ފިޓް ޖެހޭ ކުޅުންތެރިއެކެވެ. 2012 ވަނަ އަހަރު އޭއެފްސީ ޗެލެންޖު ކަޕުގައި ނޭޕާލާ ދެކޮޅަށް ކުޅުނު މެޗެއްގައި ކުއްލިއަކަށް ދަނޑު މައްޗަށް ވެއްޓި ހޮކޭ ވަނީ އަވަސް ފަރުވާ އަށް ހޮސްޕިޓަލަށް ގެންގޮސްފަ އެވެ. 0-1 އިން ރާއްޖެ ކާމިޔާބުކުރި އެ މެޗުގެ ހަމައެކަނި ގޯލުވެސް ކާމިޔާބުކުރީ އޭނާ އެވެ. އޭގެ އިތުރުން 2016 ވަނަ އަހަރު އޭޝިއަން ކަޕު ކޮލިފައިންގައި ޔަމަންއާ ދެކޮޅަށް ކުޅުނު މެޗެއްގައި ވެސް ނޭވާލުމުގައި އުނދަގޫތަކެއް ކުރިމަތިވެގެން އޭނާ ވަނީ ހޮސްޕިޓަލަށް ގެންގޮސްފަ އެވެ.
މިފަދަ ސިއްހީ މައްސަލަތަކާ ގުޅިގެން ހޮކޭ ވަނީ މީގެ ކުރިން ފުޓްބޯޅަ ކުޅުން ހުއްޓާލިކަން ވެސް އިއުލާނު ކޮށްފަ އެވެ. ނަމަވެސް ފަހުން އޭނާ ވަނީ ދެވަނަ ޑިވިޝަނުގައި އޮޑި ސްޕޯޓްސް އަށް ކުޅެން ފަށާފަ އެވެ. އަދި އޭނާގެ ކެޕްޓަންކަމުގެ ދަށުން ފުރަތަމަ ޑިވިޝަނަށް އޮޑި ގެންގޮސްދިނެވެ.
