ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުން ބޭނުންވި ނަތީޖާ ނެރެދެއްވައި ގައުމު ހަމަމަގަށް އަޅުވައިދެއްވައިފި ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަދި މަޝްހޫރު ވިޔަފާރިވެރިޔާ އަބްދުﷲ ޖާބިރު ވިދާޅުވެއްޖެއެވެ.
އެމްއެމްޓީވީ "ދިވެހީންގެ ރާއްޖެ" ޕްރޮގްރާމެއްގައި ވާހަކަފުޅު ދައްކަވަމުން ޖާބިރު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ގައުމު އޮތް ހާލަތު އެންމެނަށްވެސް އެނގޭ ކަމަށާއި ވެރިކަމަށް ވަޑައިގެން އެމަނިކުފާނު އެސެސްމެންޓު ހެއްދެވުމަށްފަހު ގައުމު ހަމަ ހަމަގަށް އަޅުވަން ކުރަންހުރި މަސައްކަތްތައް ކޮށްދީ ނަތީޖާ ނެރެދެއްވާފައިވާ ކަމަށެވެ. އެގޮތުން ކުރީ ސަރުކާރުގެ ދަރަނިތައް ދައްކައި ރައްޔިތުންނަށް ބޭނުންވާ އަސާސީ ހިދުމަތްތައް ފަހިކޮށްދީ ބަނގުރޫޓުވެފައިވާ އިގްތިސާދު ނަގައި ކޮޅަށް ޖަހާފައިވާ ކަމަށާއި ރައްޔިތުން އެދޭ ނަތީޖާއަކީ އެއީ ކަމަށް ޖާބިރު ވިދާޅުވި އެވެ.
އެގޮތުން ގައުމުކުރިއަރައި ގޮސް ނިޒާމު ހަރުދަނާވެ، ވިޔަފާރިތައްވެސް ނަގާ ކޮޅަށް ޖަހާފައިވާކަން ޖާބިރު ފާހަގަކުރެއްވިއެވެ.
Advertisement
"ނަތީޖާ ނެރެވުނީމަތާ ސްޓޭބިލިޓީ މިއޮތީ. އެއީ ރައްޔިތުން ގަބޫލުކުރި ނަތީޖާއަކީ،" ޖާބިރު ވިދާޅުވިއެވެ.
މި ސަރުކާރުން ވެރިކަމާ ހަވާލުވިއިރު ރާއްޖެ އޮތީ ބޮޑު އަނދަވަޅެއްގެ ތެރޭގައިކަން ފާހަގަކުރައްވަމުން ޖާބިރު ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވިއިރު ދައުލަތުގެ ވަތްގަޑުގައި އެއްވެސް އެއްޗެއް ނެތް ކަމަށާއި ކުރިޔަށް އޮތްތަނުގައި ގައުމަށް ލިބެން އޮތް އެއްޗެއްވިޔަސް ނިމިދިޔަ އެމްޑީޕީ ސަރުކާރުން އޮތީ ހުސްކޮށްލާފައި ކަމަށެވެ.
އަދި އެއާ ވިދިގެން ގައުމު ބަނގުރޫޓުވެއްޖެކަމަށް ގިނަ ބަޔަކު ބުނަމުންދިޔަ ނަމަވެސް މިހާރު ފެނިގެންދަނީ މިސަރުކާރުން ކަންތައްތައް މެނޭޖްކޮށް ގައުމުގެ ހާލަތު ބަދަލުކޮށްފައިވާ މަންޒަރުކަމަށް ޖާބިރު ވިދާޅުވި އެވެ.
"ރައީސުލްޖުމްހޫރިއްޔާއަކަށް ހުންނެވި ބޭފުޅަކަށް މިފަދަ ޑިސިޝަންތައް ނެންގެވުމަކީ އެއީ ވަރަށް ކެޕޭސިޓީ ހުރެގެން އެކަން ކުރެވޭނީ، ވަރަށް މުރާލިވެގެން ނޫނިއްޔާ ނުކުރެވޭނެ ވަރަށް ގިނަ ކަންތައްތައް ހަމަޖެހިގެން މިދިޔައީ،" ރައީސް މުއިއްޒު ޑޮލަރުގެ މައްސަލަ ހައްލުކުރެއްވިގޮތަށް އިޝާރާތްކުރައްވައި ޖާބިރު ވިދާޅުވިއެވެ.
ޖާބިރު ވިދާޅުވީ މި ސަރުކާރުން ހުރިހާ ކަމެއް ބައްޓަންކުރަނީ ރައްޔިތުންނަށް ފައިދާވާ ގޮތަށް އެންމެ ރަނގަޅަށް ކަމަށާއި ފާއިތުވި ސަރުކާރުތަކާއަޅާބަލާއިރު ރައީސް މުއިއްޒުގެ ވެރިކަމުގައި މާގިނަ އަދި ފައިދާހުރި މަސައްކަތްތަކެއް މި ދެއަހަރު ކޮށްފައިވާ ކަމަށް ޖާބިރު ވިދާޅުވިއެވެ.
