ހޮނިހިރު ދުވަހުގެ ރޭ ޖެހި ގޯލާއެކު އުމުރުން 40 އަހަރުގެ ކްރިސްޓިއާނޯ ރޮނާލްޑޯ އޭނާގެ ކެރިއަރުގައި 1،000 ގޯލު ހަމަކުރަން ދެން ބޭނުންވާނީ ބަރާބަރު 50 ގޯލެވެ.
ސައޫދީ ޕްރޯ ލީގުގައި އަލް-ހަޒްމް އަތުން އަލް-ނަސްރު މޮޅުވެފައިވަނީ 0-2 ގެ ނަތީޖާއިންނެވެ. މި މެޗުގައި ދެން ގޯލު ޖެހީ މި ސީޒަނުގައި މޮޅު ކުޅުމެއް ދައްކަމުން އަންނަ ޕޯޗުގަލްގެ ޖޯ ފްލެކްސް އެވެ.
ރޭގެ މެޗަށް ފަހު ރޮނާލްޑޯ ބުނެފައިވަނީ ޓީމު މޮޅުވާން އެހީތެރިވެދީ 950 ގޯލު ހަމަވުމުން އުފާކުރާ ކަމަށާއި އިތުރު ގޯލުތަކެއް ޖަހަން އޭނާ ހުރީ ފެންބޮވައިގެންފައި ކަމަށެވެ. ނިމިދިޔަ ހަފްތާގައި ވެސް ރޮނާލްޑޯ ވަނީ ދުރުން ގޯލެއް ޖަހާފަ އެވެ. އެ މެޗު ނިމުމަށްފަހު އިންސްޓަގްރާމްގައި އޭނާ ލިޔެފައިވަނީ "ސަކްސެސް އިޒް ނޮޓް އެން އެކްސިޓެންޓް" ނުވަތަ ކާމިޔާބަކީ އެކްސިޑެންޓެއް ނޫން މިހެންނެވެ. އޭނާ އެ ބުނި ބަހުގެ މާނައަކީ އޭނާ ކާމިޔާބު ހޯދަނީ މަސައްކަތްކޮށްގެން ކަމެވެ. ރޮނާލްޑޯ ވަނީ މީގެ ކުރިން އޭނާ ރެކޯޑުތައް ފަހަތުން ނުދާ ކަމަށާއި އޭނާގެ ފަހަތުން ރެކޯޑުތައް އަންނާނެ ކަމަށް ބުނެފަ އެވެ.
އެއީ ތެދެކެވެ. އުމުރުން 40 އަހަރު ވެފައިވާއިރު ވެސް މާ މޮޅު ހުނަރެއް ނުދެއްކުނަސް ޓީމަށް އެންމެ މުހިންމު ވަގުތުތަކުގައި ގޯލުތައް ޖަހަން ހުންނަނީ އޭނާ އެވެ. ޓީމަކަށް އެންމެ ބޭނުންވާނީ ގޯލެވެ. ބޮޑު އަނިޔާއެއް ނުވާނަމަ އަންނަ އަހަރު ނިމުމުގެ ކުރިން ރޮނާލްޑޯ އަށް 1،000 ގޯލު ހަމަ ކުރެވޭނެ ކަމަށް ބެލެވެ އެވެ. މިއަހަރު މިހާތަނަށް އޭނާ ވަނީ 34 ގޯލު ޖަހާފަ އެވެ. އެއީ ކޮންމެ 96 މިނެޓަކުން ގޯލެކެވެ.
ސައުދީ ޕްރޯ ލީގުގައި މި ސީޒަނުގެ މިހާތަނަށް ހަ މެޗު ކުޅެފައިވާއިރު އަލް ނަސްރު ވަނީ ހުރިހާ މެޗަކުން މޮޅުވެފަ އެވެ. އެ ލީގުގެ ތާވަލަށް ބަލާއިރު؛
- އަލް ނަސްރު - 18 ޕޮއިންޓް
- އަލް-ތާވޫން - 15 ޕޮއިންޓް
- އަލް-ހިލާލް- 14 ޕޮއިންޓް
- އަލް-ގަދްސިޔާހް - 14 ޕޮއިންޓް
- އަލް-އަހްލީ - 12 ޕޮއިންޓް
