ބައިނަލްއަގްވާމީ ރަހުމަތްތެރިކަމުގެ މެޗެއްގައި ސައުތު ކޮރެއާގެ އަމިއްލަ ގައުމުގައި ބްރެޒިލުން އެމީހުން 0-5 ގެ ނަތީޖާއަކުން ލަދު ގަންނުވާލައިފި އެވެ.

އިންޓަނޭޝަނަލް ބްރޭކުގައި މިއަދު ހަވީރު ކޮރެއާގެ ސޯލް ވޯލްޑް ކަޕު ސްޓޭޑިއަމްގައި ކުޅުނު މި މެޗުގައި އެސްޓީވާއޯ އަދި ރޮޑްރީގޯ ވަނީ ކޮންމެ ކުޅުންތެރިޔެެއް ދެ ގޯލު ޖަހައިދީފަ އެވެ. ދެން ގޯލު ޖަހާފައިވަނީ ވިނީޝިއަސް ޖޫނިއާ އެވެ.

މެޗުގެ 13 ވަނަ މިނެޓުގައި އެސްޓީވާއޯ، ސައުތު ކޮރެއާގެ ގޯލު ހުޅުވާލީ ބްރޫނޯ ގުއިމަރޭސް ތަނަވަސްކޮށްދިން ރީތި ފުރުސަތެއްގެ ބޭނުން ހިފައިގެންނެވެ. ފުރަތަމަ ހާފު ނިމެން ތިން މިނެޓަށް ވެފައިވަނިކޮށް މެޗުގެ ދެވަނަ ގޯލު ރޮޑްރީގޯ ގޯލަށް ފޮނުވާލީ ކަސެމީރޯ ތަނަވަސްކޮށްދިން ފުރުސަތަކުންނެވެ.

މި މެޗުގައި ގިނަ ވަގުތު ބޯޅަ ހިފަހައްޓައި ގިނަ ހަމަލާތައް ވެސް ގޯލަށް ފޮނުވާލާފައިވަނީ ދުނިޔޭގެ ޗެމްޕިއަން ރެކޯޑު އަދަދަކަށް ހޯދި ބްރެޒިލުންނެވެ. ޖުމްލަ 14 ހަމަލާ ގޯލަށް ފޮނުވާލިއިރު އޭގެ ތެރެއިން ހަތް ހަމަލާ ވަނީ ގޯލާ އަމާޒުވެފަ އެވެ. ކޮރެއާއަށް ޖުމްލަ ފޮނުވާލެވުނީ ހަތަރު ހަމަލާ އެވެ. އަދި ގޯލާ އަމާޒުވީ އެންމެ ހަމަލާއެކެވެ.

މެޗުގެ ތިން ވަނަ ގޯލު 48 ވަނަ މިނެޓުގައި ޖަހައިދިނީ ފުރަތަމަ ގޯލު ވެސް ޖަހައިދިން އެސްޓީވާއޯ އެވެ. އޭނާ މި ގޯލު ޖަހާފައިވަނީ ކޮރެއާގެ ޑިފެންޑަރަކަށް ހެދުނު ގޯހެއްގެ ބޭނުން ހިފައިގެންނެވެ. އޭގެ މިނެޓެއް ފަހުން ރޮޑްރީގޯ ވަނީ މެޗުގެ ހަތަރު ވަނަ ގޯލު ޖަހާފަ އެވެ. މި ގޯލަކީ ވެސް ސައުތު ކޮރެއާގެ ކުޅުންތެރިން އެމީހުންގެ ހާފުގައި ގޯސްތަކެއް ހަދައިގެ އޭގެ ފައިދާ ނަގައި ޖެހި ގޯލެކެވެ. އަދި މެޗުގެ ފަހު ގޯލު 77 ވަނަ މިނެޓުގައި ކާމިޔާބުކުރީ ވިނީޝިއަސް އެވެ. އޭނާ އަށް މި ގޯލު ޖަހަން އޭހީވީ މެތިއުސް ކުންހާ އެވެ.

ބްރެޒިލްއާ ވާދަކޮށް ސައުތު ކޮރެއާ އެންމެ ފަހުން ކުޅުނު ފަސް މެޗުން ވެސް މޮޅުވެފައެއް އަދި އެއްވަރު ވެފައެއް ވެސް ނުވެ އެވެ. ފަސް މެޗުން ވެސް މޮޅުވީ ބްރެޒިލް އެވެ.

އަންނަ އަންގާރަ ދުވަހު ރަހުމަތްތެރިކަމުގެ މެޗެއްގައި ބްރެޒިލާއި ޖަޕާން ބައްދަލުކުރާނެ އެވެ. ޖަޕާނުގައި ކުޅޭ މި މެޗު ފަށާނީ ރާއްޖެ ގަޑިން 15:30 ގައެވެ.