އިނގިރޭސި ޕްރިމިއަރ ލީގުގައި ރެއަކީ ބޮޑެތި ކުލަބުތަކަށް އެހާ ފަސޭހަ ރެޔަކަށް ނުވިއެވެ. މެންޗެސްޓަރ ޔުނައިޓެޑް އަދި ޗެލްސީ ބަލިވެގެންދިޔައިރު ޓޮޓެންހަމް މިވަނީ ތާވަލުގެ ފުލުގައި އޮތް ވުލްވްސް އަތުން އެއްވަރުވެފައެވެ.
ނަމަވެސް ބޮޑު ހިތްދަތިކަމެއް ކުރިމަތިލާން ޖެހުނީ ރަނގަޅު ފޯމެއްގައި އޮތް ލިވަޕޫލެވެ. ބަލިނުވެ 18 މެޗު ހިފަހައްޓާލާ އެންމެ ފަހުން ޕެލެސްއިން މިވަނީ މުބާރާތުގެ ފެވަރިޓުންގެ ގޮތުގައި ބެލެވޭ ލިވަޕޫލްގެ ޒަމާން އެންމެ ފަހު މިނެޓުގައި ދުއްވާލާފައެވެ. 1-2 ގެ ނަތީޖާއިން ބަލިވި މި މެޗާ ހަމަޔަށް މި ސީޒަނުގައި އެ ކުލަބު ބަލިވެފައެއް ނުވެއެވެ.
ބޮޑެތި ޓީމުތަކަށް ބޮޑު ބިރަކަށް ވެފައިވާ ޕެލެސް ވަނީ ހޮނިހިރު ދުވަހުގެ ރޭ އަމިއްލަ ދަނޑުގައި ފުރަތަމަ ހާފުގެ ނުވަވަނަ މިނެޓުގައި ގޯލެއް ޖަހައި ލިވަޕޫލް ހާސްކަމެއްގެ ތެރެއަށް ވައްޓާލާފައެވެ. ލިބުނު ކޯނަރެއްގައި ލިވަޕޫލްގެ ޑިފެންޑަރަކަށް ހެދުނު ގޯހެއްގެ ބޭނުންހިފައި ޕެލެސްއަށް ގޯލު ޖަހައިދީފައިވަނީ އިސްމައިލާ ސާރ އެވެ. ލިވަޕޫލަށް އެއްވަރުކޮށްދިން ގޯލަކީ ބަދަލު ކުޅުންތެރިއެއްގެ ގޮތުގައި ކުޅެންއެރި ޗިއޭސާ އެވެ. 87 ވަނަ މިނެޓުގައި ޗިއޭސާ މި ގޯލު ޖަހާފައިވަނިކޮށް ލިވަޕޫލް މޮޅުވުމުގެ ސްޓްރީކް ޕެލެސްއިން ދުއްވާލީ މެޗު ނިމެން މިނެޓަކަށް ވެފައި ވަނިކޮށް އެޑީ ކެއިޓަރ އެވެ.
މި މެޗުގެ ކުރިން ލިވަޕޫލް އެންމެ ފަހުން ލީގުގައި ބަލިވެފައިވަނީ މިއަހަރު މެއި މަހުގައި ބްރައިޓަން އަތުންނެވެ. އަދި ލީގުގައި ބަލިނުވެ 14 މެޗު ޕެލެސްއިން މިވަނީ ހަމަކޮށްފައެވެ.
ޕްރިމިއަރ ލީގުގެ ތާވަލަށް ބަލާއިރު އެއްވަނައިގައި 15 ޕޮއިންޓާއެކު އަދިވެސް އޮތީ ލިވަޕޫލެވެ. ދެވަނައިގައި 12 ޕޮއިންޓާއެކު ޕެލެސް އޮތްއިރު ތިން ވަނައިގައި 11 ޕޮއިންޓާއެކު އޮތީ ޓޮޓެންހަމެވެ. މިރޭ އާސެނަލްއާ ނިއުކާސަލް ބައްދަލުކުރާ މެޗުން އާސެނަލް މޮޅުވެއްޖެނަމަ ދެވަނައަށް އެރުމުގެ ފުރުސަތު އެބައޮތެވެ.
