އިނގިރޭސި ޕްރިމިއަރ ލީގުގައި ފަހު މިނެޓުގައި ނިއުކާސަލް ބަލިކޮށް 2-3 ގެ ނަތީޖާއިން ލިވަޕޫލް މޮޅުވެއްޖެ އެވެ.
ފޯރިގަދަ ކުޅުމެއް ފެނިގެންދިޔަ މި މެޗުގައި ފުރަތަމަ ހާފުގެ 35 ވަނަ މިނެޓުގައި ގްރެވެންބާޗް ގެ ގޯލާއެކު ލިވަޕޫލުން ވަނީ ލީޑު ނަގާފައެވެ. މި ގޯލު އޭނާ ކާމިޔާބުކުރީ ގަކްޕޯ ތަނަވަސްކޮށްދިން ފުރުސަތެއްގައެވެ. ފުރަތަމަ ހާފުގެ ފަހު މިނެޓުގައި ލިވަޕޫލްގެ ވެން ޑައިކަށް ކުރި ނުރައްކާތެރި ފައުލަކާ ގުޅިގެން ނިއުކާސަލްގެ އެންތޮނީ ގޯޑަން އަށް ވަނީ ސީދާ ރަތްކާޑެއް ދައްކާ ދަނޑުން ފޮނުވާލާފައެވެ. މި ކާޑު ރެފްރީ ދައްކާފައިވަނީ ވީއޭއާރު ބެލުމަށްފަހުގައެވެ.
ފަހު ހާފު ފަށައިގެން ފުރަތަމަ މިނެޓުގައި 80 މިލިޔަން ޔޫރޯ އަށް ލިވަޕޫލާ އަލަށް ގުޅުނު ފޯވާޑު ހޫގޯ އެކިޓެކޭ ވަނީ ގޯލެއް ޖަހައި ލިވަޕޫލަށް ލީޑު ފުޅާކޮށްދީފައެވެ. މި ގޯލު ޖަހަންވެސް އެހީތެރިވެދިނީ ގަކޮޕޯ އެވެ.
މެޗުގެ ފޯރި އިތުރަށް ގަދަވެފައިވަނީ 57 ވަނަ މިނެޓުގައި ނިއުކާސަލްގެ ބްރޫނޯ ގުއިމަރޭސް ގޯލެއް ޖެހި ހިސާބުންނެވެ. މި ގޯލާއެކު ލިވަޕޫލްގެ ގޯލަށް ފުލުފުލުގައި ނިއުކާސަލުން ދިޔައީ ނުރައްކާ ކުރަމުންނެވެ. އޭގެ ނަތީޖާއަކަށްވީ 88 ވަނަ މިނެޓުގައި ވިލިއަމް އޮސޫލާ ގޯލެއް ޖަހައި ނަތީޖާ 2-2 އަށް ބަދަލުކުރުމެވެ.
ނިއުކާސަލްގެ ހިތް ކުދިކުދިވީ ފަހު މިނެޓުގައި ނުރައްކާތެރި ފޯވާޑު މުހައްމަދު ސަލާހު ހުރަސްކޮށްދިން ބޯޅަ ބަދަލު ކުޅުންތެރިއެއްގެ ގޮތުގައި ކުޅެން އެރި 16 އަހަރުގެ ރިއޯ ގޯލަށް ވައްދާލި ހިސާބުންނެވެ. މިއީ ރިއޯ ލިވަޕޫލަށް ކުޅުނު ރަސްމީ ފުރަތަމަ މެޗެވެ. އަދި ފުރަތަމަ ގޯލެވެ. މި ގޯލު ވެގެންދާނީ އޭނާގެ ކެރިއަރުގެ ތާރީހީ ގޯލަކަށެވެ.
މި މޮޅާއެކު ލިވަޕޫލަށް ވަނީ ދެ މެޗުން ހަ ޕޮއިންޓް ލިބިފައެވެ. އަދި ނިއުކާސަލަށް ދެ މެޗުން ލިބުނީ ޕޮއިންޓެކެވެ.
