ޣައްޒާ މުސްލިމުންގެ ޤާތިލް ޒަޔަނިސްޓް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ގަލަންޓް ހައްޔަރު ކުރުމުގެ އަމުރު ބައިނަލްއަޤްވާމީ ކްރިމިނަލް ކޯޓުން ނެރުމާއި ގުޅިގެން އަށް ޤައުމެއްގެ އޮފިޝަލުންނަށް އަމާޒުކޮށްގެން އެމެރިކާއިން ދަތި ކުރުމުގެ ފިޔަވަޅު އަޅަން ނިންމައިފިއެވެ.

ޓްރަމްޕްގެ ވެރިކަމުގައި މި ދަތިކުރުމުގެ ފިޔަވަޅުތައް އަޅަން މިހަތަނަށް ނިންމާފައި ވަނީ ކެނެޑާ، ފްރާންސް، ފިޖީ، ސެނެގާލް، ޔޫގަންޑާ، ޕެރޫ، ބެނިން، އަދި ސްލޮވޭނިއާގެ ފަނޑިޔާރުންނާއި ޕީޖީންނަށެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ކެނެޑާގެ ފަނޑިޔާރު ކިމްބަރލީ ޕްރޮސްޓް، ފްރާންސްގެ ފަނޑިޔާރު ނިކޮލަސް ގިލޫ، ފިޖީގެ ޑެޕިއުޓީ ޕްރޮސެކިއުޓަރު ނަޒްހަތު ޝަމީމް ޚާން އަދި ސެނެގާލްގެ ޑެޕިއުޓީ ޕްރޮސެކިއުޓަރު މާމޭ މަންޑިއޭ ނިއަންގް އަށް ދަތިކުރުމުގެ ފިޔަވަޅު އަޅާނެކަން އިއުލާންކޮށްފައެވެ.

މީގެ ކުރިން ޔޫގަންޑާ، ޕެރޫ، ބެނިން، އަދި ސްލޮވޭނިއާގެ ހަތަރު ފަނޑިޔާރަކު ވެސް ވަނީ އައިސީސީގެ ތަޙްޤީޤު ތަކުގައި ނަތަންޔާހޫ ނަސްލު ނައްތައިލުމަށް ކުރި މަސައްކަތްތަކާއި ދެކޮޅަށް ބަޔާން ހުށަހެޅުމުގެ ސަބަބުން އެމެރިކާއިން ދަތިކުރުމުގެ ފިޔަވަޅު އަޅާފައެވެ.

ޣައްޒާގެ ކުޑަކުދިން ދިރިތިއްބައި އެކުދިން އަންދާލައި ގުނަވަންތައް ބުރިބުރިކޮށް އަދި މުޅި ނަސްލު ނައްތާލުމަށް ޔަހޫދީ ޒައެނިސްޓު ވެރިޔާ ކުރާ މަސައްކަތްތަކާއި ދެކޮޅަށް އިންޓަރނޭޝަނަލް ކްރިމިނަލް ކޯޓުގައި މައްސަލަ ހުށަހެޅުމުން އެމެރިކާ ރުޅި އަންނަނީ އެ ކަމުގެ ސަބަބުން އެމެރިކާގެ ސަލާމަތަށް ބުރޫ އަރާނެ ކަމަށް ބުނެއެވެ.

ޣައްޒާ މައްސަލައިގައި ނަތަންޔާހޫ އައިސީސީ އަށް ޙާޒިރުކޮށް އޭނާ އަށް ޖަލު ޙުކުމް އިއްވައިފި ނަމަ އެމެރިކާގެ ސަރުކާރުގެ އިސް ވެރިންނާއި ދެކޮޅަށް ވެސް އެ ފަދަ ޙުކުމެއް އައުމުގެ ފުރުޞަތު އެބަ އޮތެވެ. ސަބަބަކީ ޣައްޒާ ޤަތުލުޢާންމުގެ ލޭ އެމެރިކާގެ ވެރިކަމުގެ މަތީފަޑީގައި ތިބި މީހުންގެ “އަތުގައި ހޭކިފައިވާތީ"އެވެ.