ޗާގޯސް ނުވަތަ ފޯޅަވަހި މައްސަލައިގައި ކުރީގެ ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރަށް ސިއްރު ސިޓީއެއް ނުފޮނުއްވި ނަމަ ރާއްޖެއަށް ގެއްލިފައިވާ ކަނޑުގެ ސަރަހައްދާއި ފޯޅަވަހީގެ މައްސަލަ ކުރިއަށްގެންދެވޭނެ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.
ހަލީލް މިހެން ވިދާޅުވީ ފޯޅަވަހި މައްސަލާގައި ސަރުކާރުން ކުރަމުންގެންދާ މަސައްކަތުގެ އަދާހަމަ އާއި މިހާރު ގެންގުޅޭ ސްޓޭންޑާއި ގުޅޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި ވިލުފުށީ ދާއިރާގެ މެމްބަރު ހަސަން ވަހީދު ކުރެއްވި ސުވާލަށް ޖަވާބު ދެެއްވަމުންނެވެ.
މިނިސްޓަރު ވިދާޅުވީ ގެއްލުނު ކަނޑުގެ ސަރަހައްދަކީ ދިވެހި މަސްވެރިންނަށް މުހިންމު ކަނޑެއް ކަމަށާއި އެއީ ގިނަ އަދަދަކަށް މަސްބާނާ ސަރަހައްދެއް ކަމަށެވެ. އަދި އެމައްސަލައިގައި ސަރުކާރުން އޭރު ފޮނުވި ސިޓީ ނުފޮނުވި ނަމަ ކަނޑު ހޯދުމާއި ފޯޅަވަހި ހޯދުމުގެ މައްސަލައަކީ ދިވެހިންނަށް ކުރިއަށްގެންދެވެން އޮތް މައްސަލައެއްކަން ވަރަށް ސާފުކޮށް އެނގޭކަމަށެވެ.
"ހަގީގަތަކީ އެ ސިޓީ ބޭރުނުވި ނަމަ، މިދިޔަ ސަރުކާރުން ދޫނުކުރި ނަމަ އެ ކަނޑުގެ މައްސަލައާއި ފޯޅަވަހި މައްސަލައަކީ ވަރަށް ސާފުކޮށް ދިވެހިންނަށް ކުރިއަށްދެވެން އޮތް މައްސަލައެއްގެ ގޮތުގައި އަޅުގަނޑުމެންނަށް ފާހަގަކުރެވޭ މައްސަލައެއް މައްލަސައަކީ.." ހަލީލު ވިދާޅުވި އެވެ.
ހަލީލު ވިދާޅުވީ ފޯޅަވަހި މައްސަލައިގައި ސަރުކާރުން މިހާރު ކުރަމުންދާ މަސައްކަތަކީ ބޭރުގެ އެކިއެކި ލޯޔަރުން ހޯދައިގެން އެމައްސަލަ އިތުރަށް ރިވިއުކުރުމުގެ މަސައްކަތް ކަމަށެވެ.
200 މޭލުގެ އިގްތިސާދީ ސަރަހައްދު ރާއްޖެއިން ދޫކޮށްލައި މޮރިޝަސްއަށް ދިނުމަށް ނިންމައި ކުރީގެ ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރަށް ސިޓީފުޅެއް ފޮނުއްވީ 2022 އޮގަސްޓު 22ގަ އެވެ. މި ސިޓީ އާއްމުކުރަން އެ ސަރުކާރުން ދެކޮޅުހަދަމުން ދަނިކޮށް ރިޔާސީ އިންތިހާބުގެ ދެވަނަބުރުގެ ވޯޓު ކުރިމަތިވެފައިވަނީކޮށް އެ ސިޓީ ވަނީ ސޯޝަލްމީޑިއާގައި ލީކުކޮށްލައިފަ އެވެ.
