ލޮސް އެންޖެލިސްގައި ކުއްލިއަކަށް ފެތުރުނު އަލިފާނުގެ ސަބަބުން މިހާތަނަށް 10،000 އަށް ވުރެ ގިނަ އިމާރާތް އަނދައި ހުލިވެއްޖެ އެވެ. މި ހާދިސާގައި މިހާތަނަށް 6 މީހަކު މަރުވެފައިވާއިރު، ލައްކައަށްވުރެ ގިނަ މީހުން ވަނީ މަގުމަތިވެފައެވެ.
ޕެލިސޭޑްސް ސަރަހައްދުން ފެށުނު މި އަލިފާން މިހާރު ވަނީ ފަސް ސަރަހައްދަކަށް ފެތުރިފައެވެ. އެއީ ލިޑިއާ، ހާސްޓް، ސަންސެޓް، ޕެލިސޭޑް އަދި އީޓަން ސަރަހައްދުތަކެވެ. މި ސަރަހައްދުތަކުގައި އަލިފާން އަދިވެސް ވަނީ ކޮންޓްރޯލް ނުކުރެވިއެވެ.
ލޮސް އެންޖަލިސްގެ ފަޔަރ ޑިޕާޓްމަންޓްގެ ޗީފް ޖޯން ރޮބަޓްސް ވިދާޅުވީ، "މޫސުން މިހާރު ވަނީ އިންތިހާއަށް ގޯސްވެފައި. ވައިގަދަވުމާއެކު އަލިފާން އިތުރަށް ފެތުރުމަކީ އެކަށީގެންވާ ކަމެއް" ކަމަށެވެ.
Advertisement
ސަލާމަތީ އޮފިޝަލުން މައުލޫމާތުދޭ ގޮތުގައި އިތުރު 180،000 މީހުން ސަލާމަތީ އައްސޭރިތަކަށް ގެންދިއުމުގެ މަސައްކަތް މިހާރު ދަނީ ކުރެވެމުންނެވެ. މި ހާދިސާގައި މިހާތަނަށް 50 ބިލިއަން ޑޮލަރުގެ ގެއްލުން ލިބޭނެކަމަށް ވަނީ އަންދާޒާ ކުރެވިފައެވެ.
ސަލާމަތީ އައްސޭރިތަކުގައި ލޫޓުވުމާއި ވައްކަމުގެ މައްސަލަތައް އިތުރުވަމުންދާކަން ފާހަގަކުރެވޭއިރު، ޕޮލިސް އޮފިސަރުން އިތުރަށް އެ ސަރަހައްދުތަކަށް ފޮނުވާފައިވާ ކަމަށް ލޮސް އެންޖެލިސް ޕޮލިސް ޑިޕާޓްމަންޓުން ބުނެފައިވެއެވެ.
އަލިފާން ނިއްވުމުގެ މަސައްކަތަށް އެހީތެރިވުމަށް އެމެރިކާގެ އެކި ސަރަހައްދުތަކުންނާއި އަވައްޓެރި ކެނެޑާއިން ވެސް ވަނީ ފަޔަ ފައިޓަރުން ލޮސް އެންޖެލިސް އަށް ފޮނުވާފައެވެ. ނަމަވެސް މޫސުމަށް އަންނަމުންދާ ނޭދެވޭ ބަދަލުތަކާއެކު، އަލިފާން ނިއްވުމުގެ މަސައްކަތަށް ބޮޑެތި ގޮންޖެހުންތަކެއް ކުރިމަތިވާނެއެވެ.
