ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގދ. ރަތަފަންދޫއަށް ކުރެއްވި ދަތުރުފުޅުގައި، އެރަށުގެ ކައުންސިލުން ރަށުގެ ތަރައްޤީއަށް ބޭނުންވާ ގިނަ ކަންތައްތަކެއް ހުށަހަޅުއްވައިފިއެވެ. ރައީސްގެ މި ދަތުރުފުޅަކީ ހުވަދު އަތޮޅުގެ ބައެއް ރަށްތަކަށް ކުރައްވާ ތިން ދުވަހުގެ ދަތުރުފުޅުގެ ބައެކެވެ.
މިހާރު ކުރިޔަށްދާ ޖަލްސާގައި ވާހަކަފުޅު ދައްކަވަމުން، ކައުންސިލުން ހުށަހެޅި މައިގަނޑު ކަންތައްތަކުގެ ތެރޭގައި ކައުންސިލް އިދާރާގެ ޢިމާރާތް އައުކުރުމާއި، ބަނދަރުގެ ދަތިކަން ހައްލުކުރުން ހިމެނެއެވެ. ކައުންސިލުން ބުނާ ގޮތުގައި ކައުންސިލް އިދާރާގެ މައްސަލައަކީ ކޮންމެ ސަރުކާރެއްގައި ވެސް ދައްކަމުން އަންނަ ވާހަކައެއް ނަމަވެސް، އެއްވެސް ސަރުކާރަކުން މިކަމަށް ފިޔަވަޅު އަޅާފައި ނުވެއެވެ.
މީގެ އިތުރުން، ޒުވާނުންނަށް ޔޫތު ސެންޓަރެއް، އިންޑޯ ވޮލީ ކޯޓެއް އަދި ޖިމެއް ޤާއިމުކުރުމަށާއި، ސިއްޙީ މަރުކަޒު އިތުރަށް ތަރައްޤީކުރުމަށް ވެސް ކައުންސިލުން ވަނީ އެދިފައެވެ. އަދި ސްކޫލްގައި މަލްޓިޕާޕަސް ހޯލެއް އެޅުމަށާއި، ހުއްޓިފައިވާ ފެނާއި ނަރުދަމާގެ މަޝްރޫޢު އަލުން ފެށުމަށް ވެސް ވަނީ ހުށަހަޅާފައެވެ.
Advertisement
ރަތަފަންދޫގައި އޭޓީއެމްއެއް ޤާއިމުކުރުމަށާއި، ކުނި މެނޭޖްކުރާނެ ނިޒާމެއް ޤާއިމުކުރުމަށް ވެސް ކައުންސިލުން ވަނީ އެދިފައެވެ. އަދި ފަޅުތެރެއިން ހުއިފިލަނޑާ ފަދަ މަސައްކަތްތަކުން ނަފާ ލިބޭނެ ގޮތް ހެދުމަށް ވެސް ކައުންސިލުން ވަނީ ހުށަހަޅާފައެވެ.
