އެމެރިކާގެ ފެކްޓްރީއެއްގެ ފުރާޅަށް ކުޑަ މަތިންދާބޯޓެއް ވެއްޓި ދެ މީހަކު މަރުވެ ގިނަ ބަޔަކު ޒަޚަމް ވެއްޖެ

އެމެރިކާގެ ކެލިފޯނިއާ ސްޓޭޓްގެ ފަރުނީޗަރު ފެކްޓްރީއެއްގެ ފުރާޅަށް ކުޑަ މަތިންދާބޯޓެއް ވެއްޓި ދެ މީހަކު މަރުވެ 18 މީހަކު ޒަހަމްވެއްޖެއެވެ.

ސީއެންއެން އިން ބުނި ގޮތުގައި އެކްސިޑެންޓް ހިނގި ވަގުތު ފަރުނީޗަރު ފެކްޓްރީގައި މަދުވެގެން 200 މީހުން މަސައްކަތް ކުރަމުން ދިޔަ އެވެ.

މަރުވި މީހުން ތިބީ ބޯޓުގައި ކަމަށް ބެލެވޭއިރު، ޒަހަމްވި މީހުންނަކީ ފެކްޓްރީގައި މަސައްކަތް ކުރާ މީހުންނެވެ.

^{އިތުރަށް ކިޔައިލުމަށް:}

މި އެކްސިޑެންޓް ހިނގާފައިވަނީ ލޮސް އެންޖެލިސްގެ އިރުދެކުނު 40 ކިލޯމީޓަރު ދުރުގައި އޮންނަ ފުލަރޓަން މުނިސިޕަލް އެއާޕޯޓް ކައިރީގައި ކަމަށާއި ބޯޓު ވެއްޓުނީ ކިހިނެއް ކަމެއް އަދި ނޭނގޭއިރު ފުލަރޓަން ޕޮލިހުން ވަނީ މި ދެމީހުން މަރުވިކަން ކަށަވަރުކޮށްދީފައެވެ.

ބޯޓު ވެއްޓުމުގެ ސަބަބުން އަނިޔާވި ފެކްޓަރީގައި މަސައްކަތް ކުރަމުންދާ 11 މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާ ދެމުންދާއިރު، މި ބޯޓު ވެއްޓުނީ ފުލަޓަން މުނިސިޕަލް އެއާޕޯޓުން އުދުހިތާ ދެ މިނެޓް ވެސް ނުވަނީސް ކަމަށް ޓްރެކިން ވެބްސައިޓް ފްލައިޓްއެވޭއާ އިން ބުނެ އެވެ.

ނޮވެމްބަރު މަހު ފުލަޓަން އެއާޕޯޓް ކައިރީގައި އިތުރު އެކްސިޑެންޓެއް ހިނގައި އެހާދިސާގައި ވެސް ދެ މީހަކަށް އަނިޔާވެފައިވެ އެވެ.