މި ސަރުކާރުގެ ފުރަތަމަ އަހަރުގެ ތެރޭގައި ދެ ބިލިއަން ރުފިޔާއާ ގާތްކުރާ 38 މަޝްރޫޢެއް ނިމިފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީން މިއަދު ހާމަކޮށްފިއެވެ.
ކޮންސްޓްރަކްޝަން މިނިސްޓްރީން ބުނީ މި މަޝްރޫޢުތަކުގެ ތެރޭގައި ބިން ހިއްކުން، ބަނދަރު ހެދުން، މަގު ހެދުން އަދި ފެނާއި ނަރުދަމާގެ މަޝްރޫޢުތައް ހިމެނޭކަމަށެވެ.
މިނިސްޓްރީން ބުނީ މަޝްރޫއުތައް ހިންގުމުގައި ދިމާވި އެންމެ ބޮޑު ގޮންޖެހުމަކީ ކުރީގެ ސަރުކާރުން ރަށްރަށުގައި ހުއްޓާލާފައި ހުރި މަޝްރޫޢުތައް އަލުން ފަށަން ޖެހުންކަމަށެވެ. އަދި އޭރު ފާސްކޮށްފައި އޮތް ބަޖެޓުގެ ސަބަބުން މަޝްރޫޢުތައް ހިންގުމަށް ވެސް ދަތިތަކަކާ ކުރިމަތިލާންޖެހުނު ކަމަށް ވެސް އެ މިނިސްޓްރީން ބުންޏެވެ.
Advertisement
މިހާތަނަށް ނިމިފައިވާ މަޝްރޫޢުތަކުގެ ތެރޭގައި ގދ. ތިނަދޫ މަގު ހެދުމުގެ މަޝްރޫޢާއި، ނ. މާފަރު ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަޝްރޫޢު ހިމެނެއެވެ. މީގެ އިތުރުން، ޖުމްލަ 11 ރަށެއްގެ ބިން ހިއްކުމުގެ މަޝްރޫޢު އަދި މ. މުލި، އއ. މާޅޮސް، އއ. ތޮއްޑޫ އަދި އދ. ފެންފުށީގެ ބަނދަރު ހެދުމުގެ މަޝްރޫޢުތައް ވެސް ނިމިފައިވާ ކަމަށް މިނިސްޓްރީން ބުންޏެވެ.
ފެނާއި ނަރުދަމާގެ ދާއިރާއަށް ބަލާއިރު، މިދިޔަ އަހަރެއްހާ ދުވަހުގެ ތެރޭގައި 29 މަޝްރޫޢު ނިމިފައިވާއިރު، އަންނަ މަހުގެ ނިޔަލަށް އިތުރު 26 މަޝްރޫޢު ނިމޭނެ ކަމަށް މިނިސްޓްރީން ވަނީ ލަފާކޮށްފައެވެ.
މީގެ އިތުރުން، ގުޅީފަޅު ހިއްކުމުގެ މަސައްކަތް ވެސް އެއްކޮށް ނިމިފައިވާ ކަމަށް މިނިސްޓްރީން ފާހަގަކުރިއެވެ. އަދި ކުރީ ސަރުކާރުން ފެށި ތިލަމާލެ ބްރިޖުގެ މަސައްކަތް ވެސް ބާރު ސްޕީޑުގައި މިހާރު ކުރިއަށްދާ ކަމަށް މިނިސްޓްރީން ބުންޏެވެ. މިދިޔަ އަހަރުގެ އޮކްޓޫބަރު މަހުގެ ނިޔަލަށް އެ މަޝްރޫއުގެ 28.7 އިންސައްތަ ނިމިފައިވާއިރު، މިހާރު 46.6 އިންސައްތަ ނިމިފައިވާ ކަމަށް މިނިސްޓްރީން ހާމަކުރިއެވެ.
މި ހުރިހާ މަޝްރޫޢުތަކަކީ ރާއްޖޭގެ އިޤްތިޞާދީ އަދި އިޖްތިމާޢީ ތަރައްޤީއަށް މުހިންމު މަޝްރޫޢުތަކެއް ކަމަށް މިނިސްޓްރީން ފާހަގަކޮށްފައިވެއެވެ. އަދި ކުރިއަށް އޮތް ތަނުގައި ވެސް މިފަދަ މަޝްރޫޢުތައް ހިންގުމަށް ސަރުކާރުން އިސްކަންދޭނެ ކަމަށް މިނިސްޓްރީން ބުންޏެވެ.
