ޗައިނާ ސަރުކާރުގެ ހިލޭ އެހީގައި ވިލިމާލޭގައި އަޅާ 100 އެނދުގެ ހޮސްޕިޓަލް އިމާރާތް ކުރުމުގެ މަސައްކަތް އަންނަ އަހަރުގެ މެދުތެރޭގައި ފެށޭނެ ކަމަށް އިމާރާތްކުރުމާއި ބިނާވެށި ތަރައްޤީކުރުމާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މި ހޮސްޕިޓަލްގެ ފީސިބިލިޓީ ނިންމުމުގެ އެއްބަސްވުމުގައި މިއަދު ސޮއިކުރެވުނެވެ. މި އެއްބަސްވުމުގައި ޗައިނާ ސަރުކާރުގެ ފަރާތުން ސޮއިކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލީޝިންއެވެ. ދިވެހި ސަރުކާރުގެ ފަރާތުން ސޮއިކުރެއްވީ ވަޒީރު މުއްތަލިބެވެ.
ވަޒީރު މުއްތަލިބު ވިދާޅުވީ، މިއީ ޗައިނާ ސަރުކާރުގެ ހިލޭ އެހީގައި ކުރިއަށްގެންދާ މަޝްރޫޢެއް ކަމަށާއި، ޕްރޮޕޯސަލް ހުށަހެޅި، ފީސިބިލިޓީ ހެދުމަށް ޓީމްތަކެއް ޗައިނާއިން ފޮނުވި ކަމަށެވެ. އަދި ހޮސްޕިޓަލުގައި ހުންނާނެ އިކުއިޕްމަންޓްތަކުގެ ލިސްޓާއި، ދޭނެ ޚިދުމަތްތައް ކަނޑައެޅި، މަޝްރޫޢު ކުރިއަށްގެންދަން ބޭނުންވާ ހުރިހާ މަޢުލޫމާތެއް އެއްކުރެވިފައިވާ ކަމަށްވެސް އޭނާ ވިދާޅުވިއެވެ.
Advertisement
ވަޒީރު ވިދާޅުވީ، ދެން މި މަޝްރޫޢުގައި އޮތީ ޑިޒައިން އާއި ޓެންޑަރިންގ ސްޓޭޖް ކަމަށާއި، އެ މަސައްކަތަށް ހަ މަސް ދުވަސް ނަގާނެ ކަމަށް ބެލެވޭ ކަމަށެވެ. އަދި އަންނަ އަހަރު މެދުތެރޭގައި މި ހޮސްޕިޓަލް އިމާރާތް ކުރުމުގެ މަސައްކަތް ފެށިގެންދާނެ ކަމަށް ބެލެވޭއިރު، ދެ އަހަރު ތެރޭގައި މަސައްކަތް އެއްކޮށް ނިންމާލެވޭނެ ކަމަށް ބެލެވޭ ކަމަށްވެސް ވަޒީރު ވިދާޅުވިއެވެ.
ވިލިމާލޭގައި 100 އެނދުގެ ހޮސްޕިޓަލް ތަރައްޤީ ކުރެވިގެންދާނީ ރައްޔިތުންނަށް ބޭނުންވާ ހުރިހާ ޚިދުމަތްތަކެއް އެންމެ އެކަށީގެންވާ ގޮތުގައި ލިބިގެންދާ ގޮތަށް ކަމުގައި ސިއްޙަތާ ބެހޭ ވުޒާރާއިން މީގެކުރިން ވިދާޅުވެފައިވެއެވެ. އަދި ހޮސްޕިޓަލް ތަރައްޤީ ކުރެވިގެންދާނީ ތިމާވެށްޓާ ވެސް ރައްޓެހި ގޮތަކަށް ކަމަށް ވިދާޅުވިއެވެ.
ރައީސް ޑރ. މުޙައްމަދު މުޢިއްޒު ޗައިނާއަށް ކުރެއްވި ދަތުރުފުޅުގެ ތެރެއިން ވިލިމާލޭގައި 100 އެނދުގެ ޓާޝަރީ ހޮސްޕިޓަލް ތަރައްޤީ ކުރަން ބޭނުންވާ ހިލޭ އެހީގެ އެއްބަސްވުމުގައި ވަނީ ސޮއިކުރައްވާފައެވެ. މި ހޮސްޕިޓަލަކީ 2027 ވަނަ އަހަރު ތެރޭގައި ރަނގަޅު ފެންވަރެއްގެ ޓާޝަރީ ހޮސްޕިޓަލެއްގެ ގޮތުގައި ޚިދުމަތް ދޭން ފެށޭނެ ތަނެއް ކަމަށް ވަޒީރު މުއްތަލިބު ވިދާޅުވިއެވެ.
މި މަޝްރޫޢުގެ ދަށުން ވިލިމާލޭގައި އެޅޭ ހޮސްޕިޓަލަކީ ރާއްޖޭގެ ޞިއްޙީ ދާއިރާއަށް ބޮޑު ކުރިއެރުމެއް ގެނެސްދޭނެ ތަނަކަށް ވާނެ ކަމަށް ބެލެވެއެވެ. މި ހޮސްޕިޓަލް އެޅުމުން ވިލިމާލެ އާއި ހުޅުމާލޭގެ އިތުރުން މާލެ ސަރަޙައްދުގެ އެހެން ރަށްރަށުގެ ރައްޔިތުންނަށްވެސް ފަސޭހަސޭހަކަމާއެކު ޞިއްޙީ ޚިދުމަތް ލިބިގެންދާނެއެވެ.
