އަންނަ އަހަރުން ފެށިގެން ދިވެހިރާއްޖޭގެ ގައުމީ ކުޅިވަރު ޓީމުތަކުގެ ކުޅުންތެރިންނާއި އޮފިޝަލުންނަށް އިންޝުއަރެންސް ކަވަރޭޖް ތައާރަފް ކުރުމުގެ ޕްލޭންތައް ސަރުކާރުން އިއުލާންކޮށްފި އެވެ. ސްޕޯޓްސް މިނިސްޓަރު އަބްދުﷲ ރާފިއު މިކަން އިއުލާން ކުރެއްވީ އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، އަންނަ އަހަރުގެ ބަޖެޓުގައި ބޭނުންވާ ފައިސާ ދޫކުރާނެކަން ހާމަކުރައްވަމުންނެވެ.
އިންޝުއަރެންސްގެ އިތުރުން މާލީ އެހީތެރިކަން ރަނގަޅު ކުރުމަށްޓަކައި ގައުމީ ޓީމުގެ ކުޅުންތެރިންނާއި އޮފިޝަލުންގެ މުސާރައިގެ އޮނިގަނޑު މިނިސްޓްރީން ހީވާގިކަމާއެކު އިސްލާހު ކުރަމުންދާކަން ވެސް އެމަނިކުފާނު ވަނީ ކަށަވަރުކޮށްދީފައެވެ.
މިކަން އިއުލާންކޮށްފައިވަނީ ދާދިފަހުން ދެ ކިޑްނީ ފެއިލްވެ، ފަރުވާއަށް އާންމުންގެ އެހީތެރިކަމަށް އެދުނު ގައުމީ ބޮޑީބިލްޑަރު މުހައްމަދު ޔާމީން (ޔާންބެ)ގެ މައްސަލައާ ގުޅިގެން ނޫސްވެރިން ސުވާލުކުރުމުންނެވެ.
Advertisement
ރައީސުލްޖުމްހޫރިއްޔާގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދު ވިދާޅުވީ ޔާމީންގެ ފަރުވާގެ ތެރޭގައި އާސަންދައާއި އެންސްޕާއިން މިހާރުވެސް ބޮޑެތި އެހީތެރިކަން ފޯރުކޮށްދީފައިވާކަމަށެވެ.
