ރޭ ބޭއްވުނު އިފްތިތާހީ ރަސްމިއްޔާތަކާއެކު ކްލަބް މޯލްޑިވްސް ކަޕް 2024 ފަށައިފިއެވެ. މި ރަސްމިއްޔާތު ޝަރަފުވެރިކޮށްދެއްވީ ނައިބު ރައީސް ހުސެއިން މުޙައްމަދު ލަތީފެވެ. 

އިފްތިތާހީ ރަސްމިއްޔާތުގައި ކިންގްސް ކަޕްގެ މެޗެއް ކުޅުނެވެ. މި މެޗުގައި ވާދަކުރީ މިދިޔަ އަހަރުގެ ކްލަބް މޯލްޑިވްސް ކަޕްގެ ޗެމްޕިއަން ކްލަބް ވެމްކޯ އާއި ރިސޯޓު ސުޕަރ ލީގުގެ ޗެމްޕިއަން ޖޯލި މޯލްޑިވްސްގެ ޓީމެވެ. މި މެޗުން މޮޅުވެފައިވަނީ ކްލަބް ވެމްކޯއެވެ.

ޚުލާސާއަށް މަޢުލޫމާތު ދެއްވަމުން ކްލަބް މޯލްޑިވްސްގެ ރައީސް މޫސާ ރަމީޒް ވިދާޅުވީ، ކްލަބް މޯލްޑިވްސް ކަޕް 2024 ގެ ފުރަތަމަ މެޗު ބޭއްވުމަށް ހަމަޖެހިފައިވަނީ މާދަމާ ރޭގައެވެ. މި އަހަރުގެ މުބާރާތުގައި ޖުމްލަ 28 ޓީމު ވާދަކުރާއިރު، އަންހެނުންގެ ޚާއްޞަ މުބާރާތް ކަމުގައިވާ "18-30" (އެއިޓީން-ތާރޓީ) ގައި 7 ޓީމު ބައިވެރިވެފައިވެއެވެ.

2006 ވަނަ އަހަރު ފެށުނު މި މުބާރާތަކީ ދިވެހިރާއްޖޭގެ ކުޅިވަރުގެ ދާއިރާގައި ޚާއްޞަ މުހިންމުކަމެއް ދެވޭ ހަރަކާތެކެވެ. މި މުބާރާތުގެ މައިގަނޑު މަޤްޞަދަކީ ކުޅިވަރު ކްލަބުތަކުގެ މެދުގައި އެކުވެރިކަމާއި އެއްބައިވަންތަކަން އިތުރުކުރުމެވެ.