އީރާނުގެ ބަންދަރު އައްބާސް ބަނދަރާ ކައިރިން، ހުރުމުޒު ކަނޑުއޮޅި ހުރަސްކުރަން މަސައްކަތް ކުރި ތުރުކީގެ މުދާ އުފުލާ ބޯޓެއް މެދުން ބިންދައިގެން ގޮސް ކަނޑުގެ އަޑިއަށް ހިނގައްޖެއެވެ. "ލޫނީ" ނަމަކަށް ކިޔާ މި ބޯޓު އަޑިއަށް ދިޔަ މަންޒަރު ފެންނަ ވީޑިއޯތަކެއް ސޯޝަލް މީޑިއާގައި މިހާރު ދަނީ ދައުރުވަމުންނެވެ.

ރިޕޯޓްތައް ބުނާގޮތުން މި ހާދިސާ ހިނގާފައިވަނީ އެމެރިކާއިން އެ ސަރަހައްދުގެ ރައްކާތެރިކަން ކަށަވަރުކޮށްދޭނެ ކަމަށް ބުނެފައި ވަނިކޮށް، އީރާނުގެ ރަސްމީ ހުއްދައަކާ ނުލައި ކަނޑުއޮޅި ހުރަސްކުރަން އެ ބޯޓުން އުޅުމުގެ ތެރޭގައެވެ.

މި ހާދިސާ ހިނގަން މެދުވެރިވި އަސްލު ސަބަބާއި ބެހޭގޮތުން ބައިނަލްއަގުވާމީ ކަނޑުދަތުރުފަތުރާ ބެހޭ އިދާރާތަކުން ބުނަނީ، މިއީ ބޯޓަށް ދިން ހަމަލާއެއްގެ ސަބަބުން ހިނގި ކަމެއް ނޫން ކަމަށެވެ. މި ބޯޓަކީ އިންޑިއާއިން ފުރައިގެން ދުބާއީގެ ޖެބެލް އަލީ ބަނދަރަށް ދަތުރުކުރި ބޯޓެކެވެ. ނަމަވެސް، މީގެ ދުވަސްކޮޅެއް ކުރިން އެހެން އުޅަނދަކާ މުޑިއެރުމުގެ ސަބަބުން ބޯޓުގެ ބަނޑުފިލައަށް ބޮޑެތި ގެއްލުންތަކެއް ވަނީ ލިބިފައެވެ. އަދި ބޯޓަކީ 32 އަހަރުވީ ބާ ބޯޓަކަށް ވުމުން، ކަނޑުގެ ބާނީގެ ތެރޭގައި ބަރުދަން ހިފަހައްޓާނުލެވި މެދުން ބިންދައިގެން ދިޔައީއެވެ.

ބޯޓު ދެފަޅިވެ އަޑިއަށް ދިޔަ ނަމަވެސް، އޭގައި ތިބި ހުރިހާ ފަޅުވެރިން ވަނީ ސަލާމަތްކޮށްފައެވެ. އީރާނުގެ ރެސްކިއު ޓީމުތަކުން ބޯޓުގައި ތިބި 23 ފަޅުވެރިންވެސް އެއްވެސް ގެއްލުމެއް ނުލިބި ސަލާމަތްކޮށް، އީރާނުގެ ގޭޝްމް ރަށަށް ރައްކާތެރިކަމާއެކު ވަނީ ގެންގޮސްދީފައެވެ.

ބޯޓު އަޑިއަށް ދިޔައީ ގުދުރަތީ ހާދިސާއަކުން ކަމަށް ރިޕޯޓްތައް ބުނި ނަމަވެސް، ސަރަހައްދުގެ ސިޔާސީ މަސްރަހު އޮތްގޮތުން މިކަމުގައި އެހެން ބާރެއްގެ އަތެއް ވޭތޯ ބެލުމަށް ސަލާމަތީ ފަރާތްތަކުން ދަނީ އިތުރަށް ތަހުގީގު ކުރަމުންނެވެ.