އެމެރިކާއިން އީރާނުގެ އެކި ސަރަހައްދުތަކަށް ދިން ވަރުގަދަ ވައިގެ ހަމަލާތަކަށް ރައްދު ދިނުމުގެ ގޮތުން، އީރާނުން އަވަށްޓެރި ބަހުރޭން، ކުވެއިތު އަދި އުރުދުންގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާތަކެއް ދީފިއެވެ.

މި ހަމަލާތަކާ ގުޅިގެން ގަލްފުގެ ގައުމުތަކުގައި ނުރައްކަލުގެ ރަނގަބީލު ޖަހާފައިވާއިރު، ބަހުރޭންގެ ދާޚިލީ ވުޒާރާއިން ވަނީ ރައްޔިތުން ރައްކާތެރި ހިސާބުތަކަށް ވަނުމަށް އިލްތިމާސްކޮށްފައެވެ. އީރާނުގެ އަސްކަރިއްޔާއިން ބުނި ގޮތުގައި އެ ގައުމުން ވަނީ ބަހުރޭންގައި ހުންނަ ޝެއިޚް އީސާ އެއާބޭސްއަށް ހަމަލާދީ، އެމެރިކާގެ ޑްރޯންތައް ކޮންޓްރޯލްކުރާ މަރުކަޒާއި މަރާމާތުކުރާ ތަންތަނަށް ބޮޑެތި ގެއްލުންތަކެއް ދީފައެވެ.

ކުވެއިތުގެ އަސްކަރިއްޔާއިން ބުނީ އެ ގައުމުގެ ވައިގެ ސަރަހައްދަށް ވަން ހަމަލާތައް ދިފާއީ ނިޒާމުތަކުން ހުއްޓުވަމުންދާ ކަމަށެވެ. އީރާނުން ބުނާ ގޮތުގައި ކުވެއިތުގެ އަލީ އަލް ސާލިމް އެއާބޭސްގައި ހުރި ރާޑަރުތަކާއި ވައިގެ ދިފާއީ ނިޒާމުތަކަށް ވަނީ އަމާޒުކޮށްފައެވެ. މީގެ އިތުރުން އުރުދުންގެ ޕްރިންސް ހަސަން އެއާބޭސްގައި ހުރި ތެޔޮ ގުދަންތަކާއި ހަތިޔާރު ރައްކާކުރާ ތަންތަނަށް ވެސް އީރާނުން ވަނީ ހަމަލާދީފައެވެ. އުރުދުންގެ އަސްކަރިއްޔާއިން ވަނީ އެ ގައުމުގެ ވައިގެ ސަރަހައްދުން ހަތަރު މިސައިލެއް ވައްޓާލާފައިވާ ކަމަށް ކަށަވަރުކޮށްދީފައެވެ.

ކުއިންސީ އިންސްޓިޓިއުޓްގެ އެގްޒެކެޓިވް ވައިސް ޕްރެޒިޑެންޓް ތުރިތާ ފާސީ ވިދާޅުވި ގޮތުގައި، ދެ ގައުމުގެ ދެމެދުގައި އިތުބާރު ކުޑަވި ނަމަވެސް، ދިގުލީ ހަނގުރާމައަކަށް ދިއުމަށް ދެ ފަރާތުން ވެސް ޖެހިލުންވެއެވެ. އޭނާ ފާހަގަކުރެއްވި ގޮތުގައި ދުނިޔޭގެ ބާޒާރުގައި ތެލުގެ ރިޒާވް ދަށްވެފައިވުމަކީ ދިގުލީ ހަނގުރާމައަކަށް ދިއުމަށް އޮތް އެންމެ ބޮޑު ހުރަހެވެ.

"ދުނިޔޭގެ ތެލުގެ ރިޒާވް ވަނީ ވަރަށް ބޮޑަށް ދަށްވެފައި. އެމެރިކާގެ ސްޓްރެޓީޖިކް ޕެޓްރޯލިއަމް ރިޒާވް ވެސް އޮތީ ދަށް ފަންތިއެއްގައި،" ފާސީ ވިދާޅުވިއެވެ. އޭނާ އިތުރަށް ވިދާޅުވީ ހޮރްމޫޒް ކަނޑުއޮޅީގައި އީރާނުން ދީފާނެ ހަމަލާތަކެއް ހުއްޓުވުމުގެ ގާބިލްކަން އެމެރިކާއަށް އޮތް ނަމަވެސް، އެކަމަށް ނަގާނެ ވަގުތުގެ ސަބަބުން ތެލުގެ ބާޒާރަށް އަންނާނެ ލޮޅުމަކީ އެމެރިކާގެ މިހާރުގެ ސަރުކާރަށް ސިޔާސީ ގޮތުން ކުރިމަތިވާނެ ބޮޑު ގޮންޖެހުމަކަށް ވާނެ ކަމަށެވެ.

މި ހަމަލާތަކާ ގުޅިގެން މެދުއިރުމަތީގެ މަސްރަހު މިހާރު ވަނީ ވަރަށް ބޮޑަށް ނުތަނަވަސްވެފައެވެ.