އީރާނުގެ ދެކުނުގެ ސަރަހައްދުތަކަށް އެމެރިކާއިން ދެމުންދާ ހަމަލާތަކުގެ ދެވަނަ ބުރަކަށްފަހު، އޭގެ ރައްދުގައި އީރާނުން ބުރާސްފަތި ދުވަހު ވަރުގަދަ ހަމަލާތަކެއް ދީފިއެވެ. ދެ ގައުމުގެ ދެމެދުގައި ބަދަލުކުރަމުންދާ މި ހަމަލާތަކާ ގުޅިގެން ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ އަދަދު ވަރަށް ބޮޑަށް މަދުވެފައިވާ ކަމަށް މުހައްލިލުން ބުނެއެވެ.
އެމެރިކާއިން ބުނާ ގޮތުގައި އެގައުމުން ވަނީ އީރާނުގެ އަސްކަރީ 90 އަމާޒަކަށް ހަމަލާދީފައެވެ. މީގެ ތެރޭގައި ހޮރްމޫޒް ކަނޑުއޮޅި ކައިރީގައި ހުރި ބައެއް އަމާޒުތައް ވެސް ހިމެނެއެވެ. އީރާނުގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، ފާއިތުވި ދެ ދުވަހުގެ ތެރޭގައި އެމެރިކާއިން ދިން ހަމަލާތަކުގައި 14 މީހުން މަރުވެ، 5 ޕްރޮވިންސަކުން 78 މީހުން ވަނީ ޒަޚަމްވެފައެވެ.
އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ބޫޝެހެރު ނިއުކްލިއަރ ޕަވަރ ޕްލާންޓް ކައިރީގައި ހުރި ބައެއް ތަންތަނަށް ވެސް ހަމަލާތައް ވަނީ އަރާފައެވެ. ނަމަވެސް އެމެރިކާއިން މިކަމާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ.
Advertisement
އެމެރިކާގެ ހަމަލާތަކަށް ރައްދުދިނުމުގެ ގޮތުން އީރާނުން ވަނީ ކުވައިތު، ބަހްރޭން އަދި ގަތަރުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ. އަދި ބުރާސްފަތި ދުވަހުގެ ފަހުގެ ވަގުތެއްގައި އުރުދުން އާއި އިރާގުގައި ހުރި ބައެއް ތަންތަނަށް ވެސް އީރާނުން ހަމަލާދީފައިވާ ކަމަށް ރިޕޯޓްތައް ބުނެއެވެ. މި ހަމަލާތަކާ ގުޅިގެން ބަހްރޭންގެ ވެރިރަށް މަނާމާގައި ބާރުގަދަ ގޮވުންތަކެއް އިވިފައިވާއިރު، ކުވައިތުން ވަނީ އެގައުމަށް އަމާޒުވި މިސައިލްތަކާއި ޑްރޯންތައް ވައްޓާލާފައެވެ. އަދި ގަތަރުން ވަނީ ސަލާމަތީ އެލާޓެއް ނެރެފައެވެ.
މި ހަމަލާތައް ކުރިއަށްދާއިރު، ފާއިތުވި ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން ދިން ހަމަލާއެއްގައި އަވަހާރަވި އީރާނުގެ ރޫހާނީ ލީޑަރު އާޔަތުﷲ އަލީ ހާމަނާއީގެ ޖަނާޒާގެ ކަންކަން ހަ ދުވަހަށްފަހު އީރާނުގެ މަޝްހަދު ސިޓީގައި ވަނީ ބާއްވާފައެވެ. މި ޖަނާޒާގައި ބައިވެރިވި ގިނަ އަދަދެއްގެ ރައްޔިތުން ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕާ ދެކޮޅަށް މަރުގެ އިންޒާރު ހިމެނޭ ބޯޑުތައް އުފުލާފައެވެ.
އީރާނުގެ ހާރިޖީ ވުޒާރާއިން ވަނީ އެމެރިކާގެ މި ހަމަލާތަކަކީ "ބޮޑު ހަނގުރާމައިގެ ކުށެއް" ކަމަށް ސިފަކޮށް، އެމެރިކާ ސަރުކާރަކީ "ނުބައި އަދި ނަފްސާނީ ބަލިމަޑުކަމެއް ތަހައްމަލުކުރާ" ބައެއްގެ ގޮތުގައި ސިފަކޮށްފައެވެ. އަދި މި ހަމަލާތަކުގެ ސަބަބުން ތެހެރާނާއި މަޝްހަދު ގުޅުވައިދޭ ބްރިޖްތަކާއި ރޭލްވޭ މަގުތަކަށް ބޮޑެތި ގެއްލުންތަކެއް ލިބިފައިވާ ކަމަށް ވެސް އެ ވުޒާރާއިން ބުނެއެވެ.
ބުރާސްފަތި ދުވަހުގެ ފަހުގެ ވަގުތެއްގައި އީރާނުގެ ދެކުނު ބަނދަރެއް ކަމަށްވާ ކޮނާރަކްގައި ވެސް ބާރުގަދަ ގޮވުންތަކެއް އިވިފައިވެއެވެ. އީރާނުގެ އޮފިޝަލުން ބުނާ ގޮތުގައި އެއީ "ދުޝްމަނުން" އެގައުމުގެ ކަނޑުގެ ސިފައިންގެ މަރުކަޒަކަށް ދިން ހަމަލާއެކެވެ. ނަމަވެސް އެމެރިކާގެ އަސްކަރީ އޮފިޝަލަކު ބީބީސީއަށް މައުލޫމާތު ދެމުން ބުނެފައިވަނީ ފާއިތުވި ގަޑިއިރުތަކުގައި އެމެރިކާއިން އީރާނަށް އެއްވެސް ހަމަލާއެއް ދީފައިނުވާނެ ކަމަށެވެ.
