އެމެރިކާގެ ފަސްގަނޑަށް އުފަންވާ ކުދިންނަށް އޮޓޮމެޓިކުން އެ ގައުމުގެ ރައްޔިތުކަން ލިބޭ ގޮތަށް އޮންނަ އުސޫލު (ބާތުރައިޓް ސިޓިޒަންޝިޕް) ހަނިކުރުމަށް އެގައުމުގެ ރައީސް ޑޮނަލްޑް ޓްރަމްޕް ނެރުނު ރިޔާސީ ގަރާރު އެމެރިކާގެ ސުޕްރީމް ކޯޓުން ބާތިލްކޮށްފިއެވެ.

ސުޕްރީމް ކޯޓުގެ 9 ފަނޑިޔާރުންގެ ތެރެއިން 6 ފަނޑިޔާރުންގެ އަޣުލަބިއްޔަތުން ނިންމެވި މި ނިންމުމާއެކު، ވޭތުވެދިޔަ 150 އަހަރު އެމެރިކާގައި އަމަލުކުރަމުން އައި އުސޫލު ވަނީ ދަމަހައްޓާފައެވެ. އެމެރިކާގެ ގާނޫނުއަސާސީގެ 14 ވަނަ އިސްލާހުގެ ދަށުން، އެމެރިކާގައި އުފަންވާ ކޮންމެ ކުއްޖަކީ އެމެރިކާގެ ރައްޔިތެއް ކަމުގައި ބަލައެވެ.

ޓްރަމްޕު ބޭނުންވީ އުފަންވާ ކުދިންނަށް އޮޓޮމެޓިކުން ރައްޔިތުކަން ނުލިބޭ ގޮތް ހެދުމަށެވެ. އެމެރިކާގެ ސުޕްރީމް ކޯޓުގެ މި ނިންމުމާ ގުޅިގެން ޓްރަމްޕް ސޯޝަލް މީޑިއާގައި ބުނެފައިވަނީ، މިއީ "ގައުމަށް ވަރަށް ދެރަ" ނިންމުމެއް ކަމަށެވެ. އަދި ގާނޫނުއަސާސީގައި އޮތް މި އުސޫލު ނިމުމަކަށް ގެނައުމަށްޓަކައި ކޮންގްރެސްއަށް ގާނޫނެއް ހެދިދާނެ ކަމަށް ވެސް އޭނާ އިޝާރާތް ކުރިއެވެ.

ނަމަވެސް ގާނޫނީ މާހިރުންނާއި މުހައްލިލުން ވިދާޅުވާ ގޮތުގައި، ސުޕްރީމް ކޯޓުގެ މި ނިންމުމާއެކު ޓްރަމްޕްގެ މި މަސައްކަތަށް މިވަނީ ދާއިމީ ގޮތެއްގައި ހުރަސް އެޅިފައެވެ. އަދި ގާނޫނުއަސާސީއަށް ބަދަލެއް ނުގެނެސް މިކަން ބަދަލުކުރުމަށް ރައީސަށް ކުރެވޭނެ މާބޮޑު ކަމެއް ދެން ނެތެވެ.

މި މައްސަލައިގައި ކޯޓުން ބަލާފައިވަނީ ގާނޫނުއަސާސީގެ 14 ވަނަ އިސްލާހުގައިވާ "އެމެރިކާގެ އިހުތިސާސް ހިނގާ ސަރަހައްދެއްގައި އުފަންވާ ހުރިހާ އެންމެންނަކީ އެމެރިކާގެ ރައްޔިތުން" ކަމަށް ބުނާ މާއްދާއަށެވެ. ޓްރަމްޕްގެ ސަރުކާރުން ބުނަމުން ދިޔައީ ގަވާއިދާ ހިލާފަށް އުޅޭ މީހުންނާއި ވަގުތީ ގޮތުން ތިބޭ މީހުންނަކީ އެމެރިކާއަށްވުރެ ބޮޑަށް އެމީހުންގެ އަމިއްލަ ގައުމަށް ވަފާތެރިވާންޖެހޭ ބައެއް ކަމަށެވެ. ނަމަވެސް ކޯޓުން ވަނީ އެމެރިކާގެ ފަސްގަނޑަށް އުފަންވާ ކޮންމެ މީހަކީ އެމެރިކާގެ ރައްޔިތެއްކަން ކަށަވަރުކޮށްދީފައެވެ.

ޑިމޮކްރެޓުން ވަނީ މި ނިންމުމަށް ވަރަށް ބޮޑަށް މަރުހަބާ ކިޔާފައެވެ. ހައުސް އޮފް ރެޕްރެޒެންޓޭޓިވްސްގެ މައިނޯރިޓީ ލީޑަރު ހަކީމް ޖެފްރީސް ވިދާޅުވީ، އެމެރިކާގައި އުފަންވާ ކޮންމެ މީހަކީ އެމެރިކާގެ ރައްޔިތެއްކަން ކޯޓުން މިވަނީ ކަށަވަރުކޮށްދީފައި ކަމަށެވެ. ސެނެޓްގެ މައިނޯރިޓީ ލީޑަރު ޗަކް ޝޫމަރާއި ސެނެޓަރު އެލިޒަބެތު ވޮރެން ވެސް ވަނީ މިއީ ގާނޫނުގެ ބޯމަތިން ކަންކަން ކުރަން އުޅުނު ޓްރަމްޕަށް ލިބުނު ބޮޑު ނާކާމިޔާބީއެއްގެ ގޮތުގައި ސިފަކުރައްވާފައެވެ.

ކުޑަކުދިންނާއި ހިޖުރަވެރިންގެ ހައްގުތަކަށް މަސައްކަތްކުރާ ޖަމިއްޔާތަކުން މި ނިންމުމާއެކު ހިތްހަމަޖެހުމެއް ލިބިފައިވާކަން ހާމަކޮށްފައިވެއެވެ.

މި މައްސަލައިގެ އިތުރުން، ސުޕްރީމް ކޯޓުން މިއަދު ވަނީ އެހެން ދެ މައްސަލައެއްގައި ވެސް ހުކުމް ކޮށްފައެވެ. އެއީ ސްކޫލްތަކުގެ އަންހެން ކުޅިވަރު މުބާރާތްތަކުގައި ޓްރާންސްޖެންޑަރ އެތުލީޓުން ބައިވެރިވުން މަނާކުރުމުގެ ބާރު ސްޓޭޓްތަކަށް އޮންނާނެ ކަމަށް ނިންމުމާއި، ކެމްޕޭންތަކަށް ފައިސާ ހަރަދުކުރާ ގޮތާ ގުޅޭ ގޮތުން އޮތް ބައެއް ހުރަސްތައް ނައްތާލުމަށް ނިންމި ނިންމުމެވެ.