ދެކުނު އެފްރިކާގައި އެޗް.އައި.ވީ އާއި އެއިޑްސް ފެތުރުން ހުއްޓުވުމަށް ހިންގާ މަޝްރޫއުތަކަށް ފޯރުކޮށްދެމުންދާ މާލީ އެހީތެރިކަން ހުއްޓާލުމަށް އެމެރިކާ ސަރުކާރުން ނިންމައިފިއެވެ.

އެމެރިކާގެ ސްޓޭޓް ޑިޕާޓްމަންޓުން މި ނިންމުން ނިންމާފައިވަނީ، ދެކުނު އެފްރިކާގައި ދިރިއުޅޭ މަދު އަދަދެއްގެ ދޮން ނަސްލުގެ މީހުން ނުވަތަ "އެފްރިކާނާ" މުޖުތަމައު ރައްކާތެރިކުރުމަށް އެ ގައުމުގެ ސަރުކާރުން ނުކުޅެދިފައިވާ ކަމަށް ބުނެއެވެ. ނަމަވެސް، ދެކުނު އެފްރިކާ ސަރުކާރުން ވަނީ އެ ތުހުމަތުތައް ތަކުރާރުކޮށް ދޮގުކޮށްފައެވެ.

މި ނިންމުމާ ގުޅޭގޮތުން ދެކުނު އެފްރިކާގެ ހެލްތު މިނިސްޓްރީން ބުނީ، އެހީ ހުއްޓާލިކަން ރަސްމީކޮށް އަންގާފައި ނުވި ނަމަވެސް، ބޭރުގެ އެހީއަށް ބަރޯސާނުވެ އަމިއްލައަށް ކަންކަން ބެލެހެއްޓޭނެ "ސެލްފް ރިލަޔަންސް ޕްލޭން" އެއްގެ މަސައްކަތް ކުރަމުން އަންނަ ކަމަށެވެ.

ދެކުނު އެފްރިކާ އަކީ ދުނިޔޭގައި އެންމެ ގިނަ އަދަދަކަށް އެޗް.އައި.ވީ ޖެހިފައިވާ މީހުން ދިރިއުޅޭ ގައުމެވެ. އެ ގައުމުގައި 8 މިލިއަނަށްވުރެ ގިނަ މީހުން މި ބައްޔާއެކު ދިރިއުޅެމުންދެއެވެ. އެމެރިކާގެ "ޕްރެޒިޑެންޓްސް އިމަރޖެންސީ ފަންޑް ފޯ އެއިޑްސް ރިލީފް" މެދުވެރިކޮށް، އަހަރަކު ގާތްގަނޑަކަށް 400 މިލިއަން ޑޮލަރުގެ އެހީ އެމެރިކާއިން އެ ގައުމަށް ފޯރުކޮށްދެމުން ދިޔައީ 2025 ވަނަ އަހަރާ ހަމައަށެވެ. ނަމަވެސް، ޑޮނަލްޑް ޓްރަމްޕް ވެރިކަމާ ހަވާލުވެވަޑައިގަތުމަށްފަހު ދެ ގައުމުގެ ގުޅުން ވަނީ ވަރަށް ބޮޑަށް ގޯސްވެފައެވެ.

ޓްރަމްޕް ނެރުއްވި ރިޔާސީ އަމުރެއްގައި ތުހުމަތު ކުރައްވާފައިވާ ގޮތުގައި، ދެކުނު އެފްރިކާގެ ސިޔާސަތުތަކުގެ ސަބަބުން ވަކި ނަސްލެއްގެ ބިންވެރިންނަށް އަނިޔާވެރިވުމަށް މަގުފަހިވެއެވެ. ނަމަވެސް ދެކުނު އެފްރިކާ ސަރުކާރުން ބުނަނީ، އެ ގައުމުގެ "ބްލެކް އިކޮނޮމިކް އެމްޕަވަރމަންޓް" ސިޔާސަތަކީ އެޕާތައިޑް ނުވަތަ ނަސްލީ އިމްތިޔާޒުގެ ދުވަސްވަރު ކުރިމަތިވި އިގްތިސާދީ ފަރަގުތައް ނައްތާލުމަށް ކޮންމެހެން ބޭނުންތެރި ސިޔާސަތެއް ކަމަށެވެ.

އެމެރިކާގެ މި ނިންމުމުގައި ދެކުނު އެފްރިކާއިން ބައިނަލްއަގުވާމީ އަދުލުގެ މަޖިލީހުގައި އިސްރާއީލާ ދެކޮޅަށް ހުށަހަޅާފައިވާ މައްސަލައާއި، އެ ގައުމުން އީރާނާއެކު ބާއްވާ ގުޅުމަށް ވެސް ވަނީ ފާޑުކިޔާފައެވެ. ވައިޓް ހައުސްއިން ބުނެފައިވަނީ ދެކުނު އެފްރިކާގެ "އަނިޔާވެރި އަދި އަހްލާގީ ގޮތުން ގަބޫލުނުކުރެވޭ" އަމަލުތަކުގެ ސަބަބުން ދެން އެ ގައުމަށް އެހީ ފޯރުކޮށްނުދޭނެ ކަމަށެވެ.

މީގެ އިތުރުން، ދެކުނު އެފްރިކާގައި ދޮން ނަސްލުގެ މީހުން ނައްތާލުމުގެ "ޖެނޯސައިޑެއް" ހިނގަމުންދާ ކަމަށް ބުނެ ޓްރަމްޕް ވަނީ ހަގީގަތާ ހިލާފު ވާހަކަތަކެއް ދައްކަވާފައެވެ. އަދި އެމެރިކާއިން މިހާރު ވަނީ 17 ވަނަ ގަރުނުގައި އެ ސަރަހައްދުގައި ވަޒަންވެރިވި ޔޫރަޕްގެ ދަރިކޮޅުގެ މީހުން ކަމަށްވާ "އެފްރިކާނާ" މީހުންނަށް ހާއްސަ ރެފިއުޖީ ޕްރޮގްރާމެއް ވެސް ފަށާފައެވެ.