އެމެރިކާއާއި އީރާނާ ދެމެދު ހަނގުރާމަ ހުއްޓާލުމަށް ވެވޭ އެއްބަސްވުމުގައި ސޮއިކުރުން މަދު ގަޑިއިރުތަކަކަށް ލަސްވީ އިސްރާއީލުން ބައިރޫތަށް ދިން ހަމަލާގެ ސަބަބުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

އެމެރިކާގެ މީޑިއާ އައުޓްލެޓެއް ކަމަށްވާ 'އެކްސިއޯސް' އަށް ދިން ފޯން އިންޓަވިއުއެއްގައި ޓްރަމްޕް ބުނީ، އިސްރާއީލުން ލުބުނާނުގެ ބައިރޫތަށް ދިން ހަމަލާގެ ސަބަބުން އެއްބަސްވުމުގެ ކަންކަމަށް ލޮޅުން އަރާފައިވާ ކަމަށެވެ. އަދި އީރާނުން ބަދަލުހިފާނެ ކަމުގެ އިންޒާރު ދީފައިވީ ނަމަވެސް، އާދީއްތަ ދުވަހު އެއްބަސްވުމުގައި ސޮއިކުރުމުގެ ކަންކަން ކުރިއަށްދާނެ ކަމުގެ ޔަގީންކަން އޭނާ ވަނީ ދީފައެވެ.

"އިސްރާއީލުގެ ހަމަލާގެ ސަބަބުން ކަންތައްތަކަށް ބަދަލުތަކެއް އައި. އެއްބަސްވުމުގައި ސޮއިކުރުން މަދު ގަޑިއިރުތަކަކަށް ލަސްވެގެންދިޔައީ. އަސްލު މިހާރު އޮންނަންވާނީ ސޮއިކޮށް ނިމިފައި. ނަމަވެސް މިހާރު ތާވަލުކުރެވިފައިވަނީ މީގެ މަދު ގަޑިއިރުތަކެއް ފަހުން ސޮއިކުރާ ގޮތަށް،"

އެމެރިކާގެ ރައީސް ޓްރަމްޕު

ބައިރޫތަށް އިސްރާއީލުން ދިން ހަމަލާއާ ގުޅޭގޮތުން މުޝީރުން މައުލޫމާތު ދިނުމުން ވަރަށް ބޮޑަށް ހައިރާންވި ކަމަށާއި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ މެދު ވަރަށް ބޮޑަށް ކޯފާވި ކަމަށް ޓްރަމްޕް ބުންޏެވެ. "މިއީ ވަރަށް ގޯސް ކަމެއް. އަހަރެންނަށް ގަބޫލެއްވެސް ނުކުރެވުނު. އެއްބަސްވުމުގައި ސޮއިކުރަން އެންމެ ގަޑިއިރަކަށް ވެފައި ވަނިކޮށް މިކަން މިވީ،" ޓްރަމްޕާ ހަވާލާދީ އެކްސިއޯސްއިން ރިޕޯޓުކޮށްފައިވެއެވެ.

މީގެ އިތުރުން ޓްރަމްޕް ބުނީ އީރާނާއެކު ވެވޭ މި އެއްބަސްވުމަކީ އިސްރާއީލަށްވެސް ފައިދާހުރި އެއްބަސްވުމަކަށް ވާނެ ކަމަށެވެ. ސަބަބަކީ މި އެއްބަސްވުމުގެ ދަށުން އީރާނަށް ނިއުކްލިއާ ހަތިޔާރު އުފެއްދުން މަނާކުރެވޭނެތީއާއި، ނިއުކްލިއާ މާއްދާތައް ނައްތާލަން މަޖުބޫރުވާނެތީއެވެ. އަދި އީރާނުގެ ނިއުކްލިއާ މަރުކަޒުތައް ކުއްލި ގޮތަކަށް ބަލައި ފާސްކުރުމުގެ ފުރުސަތުވެސް މި އެއްބަސްވުމުގެ ދަށުން ލިބިގެންދާނެ ކަމަށް އޭނާ ފާހަގަކުރިއެވެ.