އީރާނުން މިއަދު ހުރްމުޒް ނުހުޅުވުމުން އިޒުރޭލު ކެބިނެޓުގެ ކުއްލި ބައްދަލުވުމެއް ބާއްވަން ނިންމައިފިއެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ މިއަދު ހުރްމުޒް ކަނޑުއޮޅި ބައިނަލްއަޤްވާމީ ދުނިޔެއަށް ހުޅުވާލުމަށް އީރާނާއި އެކު ސޮއި ކުރުން އެކަށީގެންވާ ކަމަށެވެ. ނަމަވެސް އެމެރިކާ އާއި އެކު މިއަދު އެއްބަސްވުމުގައި ސޮއިކުރަން ދެކޮޅު ހަދައި، ހުރްމުޒް ކަނޑުއޮޅި ހުޅުވަން ވެސް އީރާނުގެ ސަރުކާރުން ވަނީ ދެކޮޅު ހަދާފައެވެ.

އީރާނު ހަނގުރާމައިގައި އެމެރިކާ އާއި ވާހަކަ ދައްކައި ސުލްހަ ކުރުވުމަށް އެންމެ ބޮޑަށް ވަކާލާތު ކުރަމުންދަނީ އިސްލާމްއާބާދުންނެވެ.

ޕާކިސްތާނާއި ހަވާލާދީ ހަބަރު ލިބޭ ގޮތުގައި، އީރާނުން މިއަދު މަޝްވަރާގައި ސޮއި ކުރާނެ ކަމަށް ވަރަށް ބޮޑަށް ބެލެވުނު ނަމަވެސް އީރާނުން ވަނީ އެ އެއްބަސްވުމުގައި މިއަދު ސޮއި ނުކުރާނެ ކަމަށާއި، ހުރްމުޒް ކަނޑުއޮޅި ހުޅުވާނީ ހިފަހައްޓާފައިވާ އީރާނުގެ ފައިސާތައްވެސް ދޫކޮށްލައި އަދި ލުބުނާނާއި ޣައްޒާގައި ހިނގަމުންދާ ހަނގުރާމަ ހުއްޓާލާނެ ކަމުގެ ޔަޤީންކަން ލިބި، ޢަމަލުން އެކަން ދެއްކުމުން ކަމަށް ބުނެފައެވެ.

އީރާނުން ބުނީ މަޝްވަރާގެ އެއްބަސްވުމުގައި ސޮއިކުރާނެ ތާރީޚެއް އަދި ނުނިންމާ ކަމަށެވެ.