އީރާނާއި އެމެރިކާއާ ދެމެދު ގާއިމުކޮށްފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުމުގެ މުއްދަތު އިތުރުކުރުމަށް އެމެރިކާގެ ރައީސް ޑޮނަލްޑް ޓްރަމްޕް އަދިވެސް ރަސްމީކޮށް ރުހުން ނުދޭކަމަށް ރިޕޯޓުތައް ބުނެފިއެވެ.
މި މައްސަލައާ ގުޅޭގޮތުން މަޝްވަރާ ކުރުމަށް ރައީސް ޓްރަމްޕް ހުކުރު ދުވަހު ވައިޓް ހައުސްގެ 'ސިޗުއޭޝަން ރޫމް' ގައި އޭނާގެ މުޝީރުންނާ ބައްދަލުކުރައްވާފައިވެއެވެ. މިއީ އާންމުކޮށް ހަނގުރާމައިގެ ބޮޑެތި ނިންމުންތައް ނިންމުމަށް އެމެރިކާގެ ރައީސުން ބޭނުންކުރައްވާ މަރުކަޒެވެ. ނަމަވެސް، އެ ބައްދަލުވުމަށްފަހު ރައީސް ޓްރަމްޕް އެތަނުން ވަޑައިގެންނެވިއިރުވެސް، އެއްބަސްވުމުގެ މުއްދަތު އިތުރުކުރުމާ މެދު ގޮތެއް ނުނިންމެވި ސަބަބެއް އަދި ސާފެއް ނުވެއެވެ.
މިދިޔަ ބުރާސްފަތި ދުވަހު މީޑިއާތަކުން ރިޕޯޓުކޮށްފައިވާ ގޮތުގައި، އެމެރިކާއާއި އީރާނާ ދެމެދު ވަނީ މުހިންމު އެއްބަސްވުމަކާ (އެމް.އޯ.ޔޫ) ހިސާބަށް އާދެވިފައެވެ. މި އެއްބަސްވުމުގައި ޓްރަމްޕް ސޮއިކޮށްފިނަމަ، ހަމަލާ ބަދަލުކުރުން ހުއްޓާލުމުގެ މުއްދަތު އިތުރުވެ، ހޯމްޒް ކަނޑުއޮޅި އަލުން ހުޅުވިގެންދާނެއެވެ. އަދި ދެ ގައުމުގެ ދެމެދުގައި އޮތް ނިއުކްލިއާ މައްސަލައަށް ދާއިމީ ހައްލެއް ހޯދުމުގެ މަޝްވަރާތައް ފެށުމަށްވެސް މަގުފަހިވާނެއެވެ. ނަމަވެސް މިހާތަނަށް އެއިން އެއްވެސް ކަމެއް ހަގީގަތަކަށް ވެފައެއް ނުވެއެވެ.
މި ދަނޑިވަޅުގައި ސިންގަޕޫރުގައި ހުންނެވި އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ހޮނިހިރު ދުވަހު ވިދާޅުވީ، ދެ ގައުމުގެ ދެމެދުގައި އެއްބަސްވުމަކަށް އާދެވޭނެ ކަމުގެ ފުރިހަމަ އިތުބާރު އެބައޮތް ކަމަށެވެ. އެހެންނަމަވެސް، އެއްބަސްވުމަކަށް އާދެވެންދެން ހޯމްޒް ކަނޑުއޮޅި ބަންދުކުރުމަށް އެމެރިކާގެ މަނަވަރުތަކުން ކުރިއަށްގެންދާ ބްލޮކޭޑް ދެމިއޮންނާނެ ކަމަށް އޭނާ ވިދާޅުވިއެވެ.
މީގެ އިތުރުން، އެމެރިކާގެ އަސްކަރިއްޔާ އޮތީ ކުރިއަށްވުރެ ވަރުގަދަކޮށް ކަމަށާއި، ބޭނުންވެއްޖެ ހިނދެއްގައި އަލުން ހަމަލާތައް ދޭން ފެށުމަށް ތައްޔާރަށް އޮތް ކަމަށްވެސް ހެގްސެތު ވަނީ އިންޒާރު ދެއްވާފައެވެ.
