އީރާނު ހަނގުރާމަ ހުއްޓާލާ ވަގުތު ކައިރިވެއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް ވިދާޅުވީ އެމެރިކާ އިން ވަނީ އީރާނުގެ ނޭވީ ފޮހެލައި އަސްކަރިއްޔާގެ އެތައް ބަޔަކު މަރާލާފައި ކަމަށާއި، އީރާނު މިހާރު “ވަރުބަލިވެއްޖެ” ކަމަށެވެ.

ފަހުގެ ޙަމަލާތަމުގެ ސަބަބުން އީރާނުގެ ގާބިލްކަން ދަށްވެފައިވާ ކަމަށް ވިދާޅުވެ، އެމެރިކާގެ އަސްކަރިއްޔާގެ ބާރު ގަދަކަން ޓްރަމްޕް ފާހަގަ ކުރެއްވިއެވެ.

"އަޅުގަނޑުމެންގެ އަސްކަރިއްޔާ އަކީ ދުނިޔޭގެ އެންމެ ބޮޑު އަސްކަރިއްޔާ...އަޅުގަނޑުމެން އެމީހުންގެ ނޭވީ ފޮހެލީ. އެމީހުންގެ ވައިގެ ސިފައިން ނެތިގެން ދިޔައީ. އެމީހުންގެ އެންޓި އެއާކްރާފްޓް ނެތިއްޖެ. ހަނގުރާމައަށް ބޭނުންކުރާ ހުރިހާ މެޓީރިއަލްއެއް ނެތިއްޖެ...އަޅުގަނޑު ބޭނުމެއް ނޫން އެމީހުންގެ ލީޑަރުން ނެތް ކަމަށް ބުނަން، އެއީ މާ ސަޅި ކަމެއް ނޫން، އެކަމަކު އެއީ ތެދެއް،" ޓްރަމްޕް ވިދާޅުވިއެވެ.

ޓްރަމްޕް ވިދާޅުވީ އެއްވެސް ހާލެއްގައި ނިއުކްލިއާ ހަތިޔާރު އުފެއްދުމުގެ ހުއްދަ އީރާނަށް ނުދެވޭނެ ކަމަށެވެ.

މި މޭރުމުން ޓްރަމްޕް ވިދާޅުވިއިރު، އީރާނާއި ދެކޮޅަށް ކުރި ހަނގުރާމައިގައި މުޅި ދުނިޔެއަށް ފެނިގެން ދިޔައީ ސުޕަޕަވަރޭ ކިޔައިގެން އުޅޭ އެމެރިކާ އަށް އީރާނު ކުރިމަތީގައި ފަޟީޙަތް ވި މަންޒަރެވެ. މެދުއިރުމައްޗާއި ގަލްފުގައިވާ އެމެރިކާގެ ބޭސްތައް ފުނޑިގެން ދިޔަ މަންޒަރެވެ. އެމެރިކާ އިން ބޭނުން ވީ އީރާނުގައި އެމެރިކާގެ ގޮނޑިކޮއްކޮ ސަރުކާރެއް އުފައްދާށެވެ. ނަމަވެސް އެކަން ވެސް ނުވިއެވެ.

ހަނގުރާމައިގައި އީރާނުގެ އެތައް ހާސް ބަޔަކު މަރުވެ އިންފްރާސްޓްރަކްޗަރު ސުންނާފަތިވާ ހިސާބަށް ދިޔުމުން، ބާރު ގަދަ ގައުމުތަކުގެ ޕްރެޝަރާއި އެކު ހަނގުރާމަ ހުއްޓައިލުމުގެ މަޝްވަރާތައް ފެށީ ޕާކިސްތާނުގެ އިސްނެގުމަށެވެ. ޕާކިސްތާނުގެ މެދުވެރިކަމުގެ ތެރެއިން އޭޕްރީލް މަހުގެ 8 ވަނަ ދުވަހު ހަނގުރާމަ ހުއްޓާލުމަށް އަމަލުކުރަން ފެށި ނަމަވެސް އިސްލާމްއާބާދުގައި ކުރިއަށް ގެންދިޔަ މަޝްވަރާތަކުން ދެމިއޮންނަ އެއްބަސްވުމެއް ނުފެނުނެވެ.